وفاق، چاروں صوبوں کے ساتھ مل کر نصاب میں جدت لا کر جلد تمام سکولوں میں نفاذ کرے گا ۔ فرح ناز اکبر

اسلام آباد می تعلیم سے محروم 80 ہزار میں سے 70 ہزار بچوں کو سکول میں داخل کیا جا چکا ہے وفاقی پارلیمانی سیکرٹری

اسلام آباد: وفاقی پارلیمانی سیکرٹری ایجوکیشن فرح ناز اکبر نے کہا ہےکہ وزیر اعظم شہباز شریف نے 2024 میں جو ایجوکیشن ایمرجنسی نافذ کی تھی ، اس کے زیر اثر 2028 کے آخر تک 26 ملین سکول سے باہر بچوں کو علمی دھارے میں شامل کرنا ہمارا عزم صمیم ہے۔ صوبوں کے ساتھ تعلیم کے شعبے میں نئی اور جدید اصلاحات لائی جا رہی ہیں۔ وزیراعظم شہباز شریف ایجوکیشن کو قومی ترقی میں کلیدی حیثیت دیتے ہیں اور علم و ہنر کو ہر بچے تک پہنچا نے کے لئے سرگرم ہیں۔ ان خیالات کا اظہار انہوں نے عالمی ایجوکیشن ڈے کے موقع پر راولپنڈی میں اے کیو خان سکول اینڈ کالجز کے زیر اہتمام منعقدہ ایک تقریب سے خطاب کے دوران کیا، اُنہوں نے مزیدکہا کہ سکول سے باہر ہر بچے تک تعلیم کا بنیادی حق پہنچانا حکومت کی ذمہ داری ہے ۔ علم و ہنر ڈے محروم بچوں کو تعلیمی دھارے میں لانے کے لئے پاکستان مسلم لیگ ن سر گرم عمل ہے ،طلباء کا بھی فرض ہے کہ وہ پوری ایمانداری اور لگن سے علم و ہنر کے حصول میں کاربند رہیں ۔ واضح رہے کہ 24 جنوری کو اقوام متحدہ نے تعلیم کا عالمی دن قرار دیا ہے۔ تقریب میں معروف سیاسی، تعلیمی اور سماجی شخصیات سمیت شہریوں اور طلباء کی بڑی تعداد نے شرکت کی۔