صدر ٹرمپ نے تقریب کے دوران وزیر اعظم شہباز شریف اور فیلڈ مارشل سید عاصم منیر کے ساتھ دوستانہ ملاقات کی

ڈیووس (ویب ڈیسک) سوئٹزرلینڈ کے شہر ڈیووس میں وزیر اعظم شہباز شریف کی امریکی صدر ڈونلڈ ٹرمپ کے ساتھ ملاقات توجہ کا مرکز بن گئی۔ جمعرات کو پاکستان سمیت مختلف ممالک نے ڈیووس میں غزہ امن بورڈ کے معاہدے پر دستخط کیے۔ وزیر اعظم شہباز شریف اور فیلڈ مارشل سید عاصم منیر بھی تقریب میں شریک ہوئے، اور وزیر اعظم نے پاکستان کی طرف سے معاہدے پر دستخط کیے۔ اس موقع پر وزیر اعظم کی امریکی صدر کے ساتھ خوشگوار گفتگو ہوئی، جس میں وزیر اعظم شہباز شریف کی توجہ صدر ٹرمپ کے ساتھ رہی۔ صدر ٹرمپ نے تقریب کے دوران فیلڈ مارشل سید عاصم منیر کے ساتھ دوستانہ ملاقات بھی کی۔ پاکستان کی سیاسی اور عسکری قیادت تقریب میں عالمی رہنماؤں کی توجہ کا مرکز بنی رہی۔ اس موقع پر امریکی صدر ڈونلڈ ٹرمپ نے تقریب سے خطاب کرتے ہوئے کہا کہ غزہ بورڈ آف پیس میں شمولیت پر تمام ممالک کے شکر گزار ہیں اور بورڈ آف پیس کے حوالے سے اقوام متحدہ سمیت دیگر ممالک کے ساتھ کام جاری رکھا جائے گا۔