عوامي پريس ڪلب ملير ۾ مومن مليرائي لائبريري اندر نذير چنا جي امڙ جي نالي سان ڪتابي ڪارنر قائم

ملير (رپورٽ: عبدالرشيد مورجھريو)عوامي پريس ڪلب ملير ۾ قائم ڪيل مومن مليرائي لائبريري اندر ناليواري ليکڪ ۽ دانشور نذير چنا جي امڙ جيجي امرالنسا عبدالقيوم چنا جي نالي ناياب ڪتابن تي ٻڌل هڪ خصوصي ڪارنر قائم ڪيو ويو آهي جنهن جي افتتاحي تقريب وڏي سادگي ۽ وقار سان منعقد ڪئي ويئي. تقريب ۾ صحافين، سياسي ۽ سماجي ڪارڪنن سميت علم دوست ماڻهن وڏي تعداد ۾ شرڪت ڪئي.ان موقعي تي نذير چنا ڪتابي ڪارنر جو باضابطه افتتاح ڪيو. تقريب کي خطاب ڪندي هن چيو ته ڪتاب قومن جي سڃاڻپ ۽ شعور جو بنياد آهن، ۽ لائبريريون علم، تحقيق ۽ فڪر جي واڌاري لاءِ اهم ڪردار ادا ڪن ٿيون هن چيو ته پنهنجي امڙ جي نالي سان ڪارنر قائم ڪرڻ سندس لاءِ اعزاز آهي ۽ اها ڪوشش نوجوان نسل کي مطالعي ڏانهن راغب ڪرڻ ۾ مددگار ثابت ٿيندي.پريس ڪلب جي صدر سجاد علي شاهه، سياسي سماجي اڳواڻ ادريس چانڊيو صحافي سامي ميمڻ، سماجي اڳواڻ ڪامريڊ شھباز شر، زينب لغاري، جبار خاصخيلي، طارق سھتو، عنايت شاه ۽ ٻين خطاب ڪندي چيو ته لائبريريون ڪنهن به سماج جي ذهني ترقي جو آئينو هونديون آهن. اهم ليکڪن ۽ شخصيتن جي نالي سان قائم ڪيل ڪتابي ڪارنر نه رڳو سندن خدمتن کي خراجِ تحسين پيش ڪن ٿا پر نئين نسل کي به تاريخ، ادب ۽ فڪر سان ڳنڍين ٿا. مقررن زور ڏنو ته اهڙيون علمي ۽ ادبي سرگرميون جاري رکڻ گهرجن، جيئن ملير ۽ ڀرپاسي جي علائقن ۾ پڙهڻ لکڻ جو رجحان وڌي سگهي. تقريب جي پڄاڻي تي مهمانن لائبريري جو دورو ڪيو ۽ قائم ڪيل ڪتابي ڪارنر کي ساراهيو