جھرڪ ۾ موٽر سائيڪل ريپئرنگ ۽ اسپئرپارٽس جي دڪان کي، لکين رپين جو نقصان

شهباز ميربحر جي موٽر سائيڪل ريپئرنگ ۽ اسپيئر پارٽس جي دڪان کي اوچتو باهه لڳي وئي

ٺٽو ( محمد شفيق ڀٽي) جھرڪ شهر ۾ گذريل رات لڳ ڀڳ ٻه وڳي شهباز ميربحر جي موٽر سائيڪل ريپئرنگ ۽ اسپيئر پارٽس جي دڪان تي اوچتو باهه لڳي وئي، جنهن جي نتيجي ۾ دڪان اندر موجود سمورو سامان، قيمتي اسپيئر پارٽس ۽ هڪ موٽر سائيڪل مڪمل طور سڙي رک ٿي وئي۔ باهه لڳڻ شرط علائقي ۾ خوف ۽ حراس پکڙجي ويو ۽ آس پاس رهندڙ ماڻهو وڏي انگ ۾ واقعي واري هنڌ تي پهچي ويا۔ مقامي ماڻهن فوري طور پنهنجي مدد پاڻ تحت ڪوششون ڪري باهه تي ضابطو آندو، جنهن سبب ڀرپاسي جي دڪانن ۽ ملڪيتن کي وڌيڪ نقصان کان بچائي ورتو ويو۔ متاثر دڪاندار موجب باهه سبب لڳ ڀڳ ڏهه لک رپين کان وڌيڪ جو مالي نقصان ٿيو آهي، جنهن سان سندس روزگار مڪمل طور متاثر ٿي ويو آهي۔ هن ٻڌايو ته دڪان ۾ موجود سمورو ڪاروباري سامان سڙي وڃڻ سبب هو سخت مالي پريشاني کي منهن ڏئي رهيو آهي۔ آخري اطلاعن تائين باهه لڳڻ جو اصل ڪارڻ معلوم نه ٿي سگهيو آهي، جڏهن ته امڪان ظاهر ڪيو پيو وڃي ته باهه شارٽ سرڪٽ يا ڪنهن ٻئي اوچتي سبب ڪري لڳي هجي۔ واقعي بعد علائقي جي واپاري برادري ۾ ڳڻتي جي لهر ڇانيل آهي۔