لاڙڪاڻي واسي نوجوان پوليس خلاف ڪراچي ۾ سراپا احتجاج

دڙي پوليس گهرن تي ڪاهه ڪري 60 کان وڌيڪ مينهون ڪاهي وئي: شاهد ابڙو

ملير (رپورٽ: عبدالرشيد مورجھريو) لاڙڪاڻي جي علائقي بقاپور جي رهواسي شاهد علي آبڙو عوامي پريس ڪلب ملير ۾ پريس ڪانفرنس ڪندي لاڙڪاڻو بقاپور دڙي ٿاڻي ۽ سي آءِ اي پوليس تي الزام هڻندي چيو آهي ته پنج مهينا اڳ دڙي چوڪي جي انچارج انسپيڪٽر مشتاق ٽنيو جي قتل کانپوءِ پوليس بقاپور ۽ ڀرپاسي وارن علائقن ۾ رهندڙ ماڻهن خلاف رڻ ٻاري ڏنو آهي هن الزام هنيو ته پوليس اهلڪارن سندس گهر ۾ داخل ٿي چادر ۽ چار ديواري جو تقدس پامال ڪيو ۽ بغير ڪنهن قانوني جواز جي گهر ۾ موجود سون، ايل سي ڊي، موٽر سائيڪلون، قيمتي گهريلو سامان ۽ 60 کان وڌيڪ مينهون ڪاهي ويا جڏهن ته سندن خلاف ڪو به ڪيس داخل ٿيل ناهي. هن چيو ته ان عمل سبب کين ڪروڙين روپين جو نقصان ٿيو ۽ سندن روزگار مڪمل طور تباهه ٿي ويو آهي.شاهد علي آبڙو وڌيڪ چيو ته هن سنڌ جي وزير داخلہ ، لاڳاپيل ايس ايس پيز ۽ ٻين اعليٰ اختيارين کي درخواستون ڏنيون آهن، ۽ عدالت پاران مينهون واپس ڪرائڻ جا حڪم جاري ٿيڻ باوجود اڃا تائين ڪو به عملدرآمد نه ٿيو آهي جنهن سبب پوري علائقي ۾ ڪاوڙ ڇانيل آهي . هن چيئرمين پاڪستان پيپلز پارٽي بلاول ڀٽو زرداري، صدر پاڪستان آصف علي زرداري ۽ وزيراعليٰ سنڌ مراد علي شاهه کان اپيل ڪئي ته هو فوري نوٽيس وٺي شفاف جاچ ڪرائي کين انصاف فراهم ڪيو وڃي.