ڏوڪري ۾ 7مهينا اڳ پوليس جي مبينا مقابلي ۾ مارجي ويل نادر ڏيرو جي وارثن وٽ ميڙ منٿ قافلو پهتو

صدام حسين ڏيرو ميڙ منٿ قافلي جي آجيان ڪئي ۽ پنج ڏينهن جي مهلت گهري ورتي

ڏوڪري(اطهر ميمڻ) ڏوڪري ۾ 7 مهينا پوليس جي مبينا مقابلي ۾ مارجي ويل نادر ڏيرو جي وارثن وٽ الزام آيل ڌر مظھر گلال ڏيرا برادري وٽ ميڙ منٿ وٺي پهتو،جڏھن ته مرحوم نادر علي ڏيرو جي معاملي تي هلندڙ تڪرار کي ختم ڪرائڻ لاءِ مظھر گلال جي اڳواڻي ۾ ميڙ منٿ قافلو ڏيرا برادري جي تڏي تي پهتو.ميڙ منٿ قافلو ڏيرا برادري جي اڳواڻن جنهن ۾ صدام حسين ڏيرو، عبدالستار ڏيرو، اعتبار ڏيرو، سيف الله ڏيرو، رضا محمد ڏيرو ۽ وزير ڏيرو وٽ پهتو.ميڙ منٿ قافلو مظھر گلال جي اڳواڻي ۾ ڏوڪري شھر جي سياسي ۽ سماجي شخصيتون اڳوڻي چيئرمين لياقت علي سومرو، حبيب الله کوکر، حاجي محمد کوکر، آغا جلباڻي، نثار احمد جتوئي ۽ سيد برادري جا معزز ماڻهو پڻ ميڙ منٿ قافلي ۾ شامل هيا.الزام آيل ڌر پنهنجي صفائي پيش ڪئي.جنهن کي ڏيرا برادري جي اڳواڻ صدام حسين ڏيرو ميڙ منٿ قافلي کي عزت ۽ احترام سان آجيان ڪئي ۽ معاملي کي سلجهائڻ لاءِ پنج ڏينهن جي مهلت گهري ورتي.هوڏانهن ميڙ منٿ قافلي ۾ شريڪ شھرين جو چوڻ ھو ته ڏيرا برادري ميڙ کي مان ڏنو ۽ پنج ڏينهن جي مهلت گهري ورتي آھي.هنن چيو ته انشاء الله ڏيرا برادري ۽ ميڙ وٺي آيل ڌر پاڻ ۾ کير کنڊ ٿي وينديون.هنن چيو ته ڏوڪري شھر ۾ رهندڙ ھر شھري امن گهري ٿو جيڪو شھرين جو اصلي بنيادي مطالبو ۽ جيئڻ جو حق آھي.