غير قانوني ڄارن جي استعمال جي هرگز اجازت نه ڏني ويندي: محمد علي ملڪاڻي

صوبائي وزير محمد علي ملڪاڻي جي صدارت هيٺ ماهيگيري صنعت بابت اهم اجلاس ٿي گذريو

ملير (رپورٽ: عبدالرشيد مورجھريو)محمد علي ملڪاڻي، صوبائي وزير لائيو اسٽاڪ ۽ فشريز جي صدارت هيٺ ماهيگيري صنعت بابت اهم اجلاس منعقد ٿيو، جنهن ۾ صنعت سان لاڳاپيل سمورن اسٽيڪ هولڊرز شرڪت ڪئي. اجلاس وزيراعليٰ سنڌ سيد مراد علي شاهه جي خصوصي هدايتن تي طلب ڪيو ويو. اجلاس کي خطاب ڪندي صوبائي وزير محمد علي ملڪاڻي چيو ته غير قانوني ڄارن جي استعمال جي هرگز اجازت نه ڏني ويندي. هن چيو ته بولو گجو ڄار نسل ڪشي وارو ڄار آهي، جنهن تي مڪمل پابندي برقرار رهندي. هن واضح ڪيو ته 25 ايم ايم کان گهٽ باريڪ ڄار (جهينگن لاءِ) ۽ 55 ايم ايم کان گهٽ ٻين مڇين جي ڄارن جي به هرگز اجازت نه هوندي. صوبائي وزير اعلان ڪيو ته جيڪي ماهيگير پابندي ٿيل ڄار رضاڪاراڻي طور جمع ڪرائيندا، انهن کي نوان ڄار فراهم ڪيا ويندا. هن وڌيڪ چيو ته سامونڊي آلودگي ۽ مڇي جي افزائش نسل واري سيزن دوران شڪار جي مدي ۾ واڌ يا مڪمل پابندي بابت ٻيهر اجلاس ڪوٺايو ويندو. محمد علي ملڪاڻي چيو ته قانون ۾ وڌيڪ ترميم ڪري آبي حيات جي تحفظ کي يقيني بڻايو ويندو. هن ٻڌايو ته آئين جي آرٽيڪل A25 جي روشني ۾ ماهيگيري صنعت سان لاڳاپيل سڀني ڌرين جي تجويزن تي اجلاس منعقد ڪيو ويو. هن وڌيڪ چيو ته سامونڊي ڪريڪس ۾ بولو گجو ڄار تي مڪمل پابندي لاڳو آهي، جڏهن ته صوبي جي سامونڊي حدن ۾ مخصوص اکن واري ڄار جي اجازت آهي. قانوني ترميم جي نفاذ بعد پابندي ٿيل ڄار جي استعمال تي مڪمل پابندي هوندي، جنهن سان آبي حيات جي تحفظ ۾ مدد ملندي. صوبائي وزير چيو ته ماهيگيري صنعت سان لاڳاپيل سڀني ڌرين کي گڏ کڻي هلنداسين ۽ تجويزون لکت ۾ پيش ڪيون وڃن. اجلاس ۾ سنڌ اسيمبلي ۾ فشريز جي پارلياماني سيڪريٽري ۽ ايم پي اي آصف خان ۽ رڪن سنڌ اسيمبلي محمود عالم جاموٽ پڻ شرڪت ڪئي. ان موقعي تي سيڪريٽري لائيو اسٽاڪ اينڊ فشريز سنڌ ڊاڪٽر ڪاظم حسين جتوئي، چيئرپرسن فشرمين ڪوآپريٽو سوسائٽي فاطمه مجيد، چيئرمين فشر فوڪ فورم غلام مصطفيٰ ميراڻي، ڊائريڪٽر جنرل ميرين فشريز حڪومت پاڪستان ڊاڪٽر منصور وسّاڻ، ڊائريڪٽر جنرل سنڌ ميرين فشريز ڊاڪٽر عاصم حسين، پاڪستان فشريز ايڪسپورٽ ايسوسيئيشن، سنڌ ٽرالر ايسوسيئيشن ۽ ڪراچي فشريز هاربر اٿارٽي جي اعليٰ آفيسرن سميت ٻين نمائندن به شرڪت ڪئي.