ملير ۾ ناري اڳوڻي مڙس جي ڀائرن خلاف عوامي پريس ڪلب پهچي وئي

پهرين مڙس جي وفات بعد علي نواز کهاوڙ سان پرڻو ڪيو، ڏير ڌي ۽ پٽ زبردستي کسي ويا آهن: نصرت لاشاري

ملير (رپورٽ: عبدالرشيد مورجھريو) مڙس جي وفات کان پوءِ مائيٽن جي مرضي سان ٻي شادي ڪندڙ ناري نصرت لاشاري پنهنجي مڙس علي نواز کهاوڙ سان گڏ عوامي پريس ڪلب ملير پهچي پريس ڪانفرنس ڪندي اڳوڻن ڏيرن خلاف سنگين الزام هڻندي ۽ تحفظ جي اپيل ڪئي آهي نصرت لاشاري ٻڌايو ته سندس اڳوڻو مڙس ٻه سال اڳ فوت ٿيو جنهن کان پوءِ هوءَ ٽن ٻارن سميت مائيٽن وٽ رهندي هئي، جتي زندگي ڏکي ٿي پئي. امڙ ۽ وڏي ڀاءُ جي رضامندي سان هن علي نواز کهاوڙ سان ٻي شادي ڪئي، جنهن بعد سندس اڳوڻا ڏير زبير، سرائي ۽ مور سميت سندس ننڍو ڀاءُ عاشق علي مٿس ڏمرجي پيا آهن.هن الزام لڳايو ته مخالف ڌر سندس نالي ڪيل گهر زوري خالي ڪرائڻ لاءِ حملا، قتل جون ڌمڪيون ۽ ڪوڙا ڪيس داخل ڪرائڻ شروع ڪري ڏنا آهن. سندس چوڻ موجب گهر وڏي ڀاءُ طرفان سندس نالي ڪيو ويو آهي ۽ هوءَ ڪنهن به صورت ۾ گهر خالي نه ڪندي.نصرت لاشاري وڌيڪ چيو ته اڳوڻن ڏيرن ظلم جي انتها ڪندي سندس ٽن ٻارن مان ڌيءَ ۽ پٽ کي زبردستي کسي ورتو آهي، جيڪو هڪ ماءُ سان وڏو ظلم آهي. هن چيو ته اهڙين حرڪتن سبب سندن حياتين کي سخت خطري آهن .ان موقعي تي سندس مڙس علي نواز کهاوڙ چيو ته سندن شادي گهر وارن جي مرضي ۽ اجازت سان ٿي آهي، پر هاڻي سندس گهر واري جا اڳوڻا ڏير غيرقانوني طور ٻار قبضي ۾ وٺي گهر خالي ڪرائڻ چاهين ٿا.هنن گڏيل طور سنڌ جي وڏي وزير، آءِ جي سنڌ ۽ ٻين وس وارن اختيارين کان اپيل ڪئي ته معاملي جو فوري نوٽيس وٺي مخالفن خلاف قانوني ڪارروائي ڪري کين ۽ سندن ٻارن کي تحفظ فراهم ڪيو وڃي.