ملير: صابو هيرو ڳوٺ واسي پورهيتن جو بااثرن جي مبينا ظلمن خلاف احتجاج

پنهنجي اباڻي زمين ۽ گهرن ۾ صدين کان آباد آهيون، دستاويز ۽ پراڻا ڪاغذ به موجود آهن: خدا بخش ڪلمتي

ملير (رپورٽ: عبدالرشيد مورجھريو) ملير جي علائقي صابو هيرو ڳوٺ واسي پورھيت خاندان طرفان بااثر ماڻهن جي مبينا ظلمن، زمين تي قبضي جي ڪوششن ۽ ڪوڙن ڪيسن ۾ ڦاسائڻ خلاف عوامي پريس ڪلب ملير اڳيان احتجاجي مظاهرو ڪيو ويو احتجاج ڪندڙن خدا بخش ڪلمتي، علي اصغر، سوڀارو ۽ ٻين چيو ته هو پنهنجي اباڻي زمين ۽ گهرن ۾ صدين کان آباد آهن، وٽن ملڪيت جا دستاويز ۽ پراڻا ڪاغذ موجود آهن، تنهن هوندي بااثر پنهون ڪلمتي، شاهنواز، رفيق ۽ ٻيا سندن ملڪيت تي قبضي لاءِ مختلف حربا استعمال ڪري رهيا آهن هنن الزام هنيو ته بااثر ڌر هٿياربند ماڻهن سان گڏجي سندن گهرن تي حملو ڪيو، عورتن ۽ بزرگن کي تشدد ڪيو ۽ ڌمڪيون ڏنيون ويون تہ پنھنجا اباڻا اجها ڇڏي لڏي وڃو ٻئي صورت ۾ نتيجا خراب نڪرندا مظاهرين موجب جڏهن هنن مزاحمت ڪئي ته سندن خلاف بن قاسم ٿاڻي تي ڪوڙا ڪيس داخل ڪرايا ويا جن ۾ سندن 90 ورهين جي بيمار والده کي به نامزد ڪيو ويو آهي، جيڪو عمل انسانيت جي توهين ۽ قانون جي کلي ڀڃڪڙي آهي مظاھرين جو چوڻ هو ته هو پورهيت ۽ غريب ماڻهو آهن، روزانو مزدوري ڪري پنهنجن ٻچن جو پيٽ پالين ٿا، پر بااثر پنھون ڪلمتي ۽ سندس پٽ ڀائرن کين ذهني ۽ مالي طور تي ٽوڙڻ جي ڪوشش ڪري رهي آهن ته جيئن هو دٻاءَ ۾ اچي پنهنجي اباڻي زمين ڇڏڻ تي مجبور ٿي وڃن هنن دعويٰ ڪئي ته پوليس وٽ بار بار دانهن کڻي ويا آهن پر ڪا اثرائتي ڪارروائي ناهي ٿي احتجاج ڪندڙن سنڌ حڪومت، آءِ جي سنڌ، ڊي آءِ جي اوڀر، ايس ايس پي ملير ۽ ٻين لاڳاپيل اختيارين کان مطالبو ڪيو ته معاملي جي شفاف جاچ ڪرائي کين تحفظ فراهم ڪيو وڃي، ڪوڙن ڪيسن کي ختم ڪيو وڃي ۽ مبينا طور تي ملوث بااثر ماڻهن خلاف قانوني ڪارروائي ڪئي وڃي هنن خبردار ڪيو ته جيڪڏهن کين انصاف نه مليو ته هو احتجاج جو دائرو وسيع ڪندا