انتھاپسنديءَ جي روڪٿام واري عالمي ڏينهن تي ملير ۾ تقريب

عوامي پريس ڪلب ملير ۾ ٿيل تقريب۾ شدت پسنديءَ خلاف گڏيل جدوجهد جو عزم

ملير (رپورٽ: عبدالرشيد مورجھريو)انتھاپسنديءَ جي عالمي ڏينهن جي موقعي تي عوامي پريس ڪلب ملير جي زيرِ اهتمام هڪ باوقار تقريب منعقد ڪئي وئي جنهن ۾ سياسي، سماجي، علمي ۽ ادبي شخصيتن، صحافين ۽ علائقي واسين وڏي تعداد ۾ شرڪت ڪئي تقريب ۾ عوامي پريس ڪلب ملير جي صدر سيد سجاد علي شاهه، خاص ڊولپمينٽ آرگنائيزيشن جي صدر عبدالجبار خاصخيلي، سنڌ سماجي سٿ جي اڳواڻ شمس جويو، سينيئر صحافي سامي ميمن، عوامي پريس ڪلب ملير جي جنرل سيڪريٽري طارق جان سهتو، ايگرو ٽيڪنيڪل اسڪول جي پرنسپل شفقت حاجاڻو، جدوجهد ڪميٽي جي اقبال ڪلمتي، شيراز سولنگي، فيض هيسباڻي، سوڀارو ڪلمتي سميت ٻين معززن خطاب ڪيو تقريب ۾ عوامي پريس ڪلب ملير جي صدر سيد سجاد علي شاهه پنهنجي خطاب ۾ چيو ته انتھاپسندي ۽ پرتشدد نظريا معاشري جي امن، ترقي ۽ يڪجهتي لاءِ سنگين خطرو آهن. هن زور ڏنو ته نوجوان نسل کي شدت پسند سوچ کان بچائڻ لاءِ تعليم، شعور ۽ برداشت کي هٿي ڏيڻ جي اشد ضرورت آهي. سندس چوڻ هو ته رواداري ۽ قانون جي بالادستي ئي پائيدار امن جي ضمانت آهي هن چيو ته عوامي پريس ڪلب ملير شدت پسنديءَ جي خاتمي ۽ امن جي قيام لاءِ پنهنجو ڪردار ادا ڪندو رهندو سنڌ سماجي سٿ جي شمس جويو ۽ صحافي سامي ميمڻ چيو ته ميڊيا جو ڪردار انتهائي اهم آهي، صحافين کي گهرجي ته هو ذميواراڻي رپورٽنگ ذريعي سماج ۾ مثبت سوچ کي ھٿي ڏين ۽ نفرت انگيز بيانن جي حوصلا شڪني ڪن خاص ڊولپمينٽ آرگنائيزيشن جي صدر عبدالجبار خاصخيلي چيو ته سماجي تنظيمون نوجوانن کي مثبت سرگرمين ڏانهن راغب ڪري انتھاپسنديءَ جي رجحانن جو مؤثر تدارڪ ڪري سگهن ٿيون جدوجهد ڪميٽي جي اقبال ڪلمتي ۽ شيراز سولنگي چيو ته رياستي ادارن، تعليمي ادارن، ميڊيا ۽ سول سوسائٽي کي گڏيل حڪمت عملي اختيار ڪرڻي پوندي ته جيئن شدت پسند عنصرن کي روڪي سگهجي ٻين مقررن چيو ته اختلافِ راءِ کي برداشت ڪرڻ ۽ آئين ۽ قانون جي پاسداري ڪرڻ ئي مهذب معاشري جي سڃاڻپ آهي. هنن حڪومت کان مطالبو ڪيو ته تعليمي نصاب ۾ رواداري، بين المذاهب هم آهنگي ۽ قومي يڪجهتي جي موضوعن کي وڌيڪ مؤثر نموني شامل ڪيو وڃي تقريب جي پڄاڻي تي ان عزم جو اظهار ڪيو ويو ته انتھاپسنديءَ خلاف هر سطح تي جدوجهد جاري رکي ويندي..