عبدالله ڳوٺ ۾ ٻن معصوم ڀينرن کي مبينا اغوا ڪرڻ جي ڪوشش

جوابدار ماڻهن جي پهچڻ تي سندن ڪنن مان واليون لاهي فرار ٿي ويا

ملير (رپورٽ: عبدالرشيد مورجھريو) شاهه لطيف ٿاڻي جي حد عبدالله ڳوٺ ۾ ٻن معصوم ڀينرن کي مبينا طور اغوا ڪرڻ جي ڪوشش ڪئي نياڻين جي رڙين تي گڏ ٿيل ماڻهن کي ڏسي جوابدار ڪنن مان واليون لاهي فرار ٿي ويا۔ واقعي بعد وارثن شاهه لطيف ٿاڻي تي درخواست داخل ڪرائي آهي، جڏهن ته متاثر خاندان پي موج الدين نياڻين سان گڏ پريس ڪلب پهچي احتجاج ڪندي جوابدارن جي فوري گرفتاري جو مطالبو ڪيو آهي سندس چوڻ هو ته منهنجون نياڻيون نون سالن جي فهميده ۽ چئن سالن جي دادلي گهر ڀرسان کيڏي رهيون هيون ته اوچتو نامعلوم ماڻهن کين اغوا ڪرڻ جي ڪوشش ڪئي۔سندن رڙين ۽ واويلا تي پاڙي وارا فوري طور پهچي ويا، جنهن تي جوابدار مبينا طور ٻنهي ڀينرن جي ڪنن مان سون جون واليون لاهي فرار ٿي ويا۔هن وڌيڪ چيو ته علائقي ۾ امن امان جي صورتحال ڳڻتي جوڳي بڻجي چڪي آهي ۽ معصوم ٻار به محفوظ ناهن۔ هن الزام هنيو ته جوابدار کلئي عام گهمي رهيا آهن ۽ پوليس کي فوري ڪارروائي ڪري کين گرفتار ڪرڻ گهرجي۔ وارثن جو چوڻ آهي ته واقعي بعد شاهه لطيف ٿاڻي تي لکت ۾ درخواست جمع ڪرائي وئي آهي، پر اڃان تائين جوابدارن جي گرفتاري عمل ۾ نه آئي آهي۔ هنن اعليٰ اختيارين کان مطالبو ڪيو ته واقعي جو سخت نوٽيس وٺي معصوم ٻارن کي انصاف فراهم ڪيو وڃي