ٺٽي ضلعي جي مختلف شهرن ۾ مرف خلاف احتجاجي مظاهرا

ٺٽو( رپورٽ شفيق ڀٽي)ٺٽي ضلعي جي مختلف شهرن ۾ مرف خلاف احتجاجي مظاهرا ڪيا ويا، جنهن ۾ گھارو، جھرڪ، ٺٽو، ۾ مبينا ڪرپشن ۽ عملي کي هيسائڻ خلاف احتجاج ڪيو ويو. گھارو ۾ سرفراز سومرو، جي اڳواڻي ۾ حاجي قادر ميمڻ، ڊاڪٽر رياض شاهه، عالم الدين بروهي، امان الله سرڪي، دالدار خاصخيلي ۽ راڻا فاروق انور خاصخيلي احتجاجي مظاهرو ڪيو ويو ، ۽ وڏي انگ ۾ پيراميڊيڪل اسٽاف ۽ شهرين شرڪت ڪئي. احتجاج ڪندڙن جو چوڻ هو ته مرف رٽائرڊ ملازم، ايم ايس جهرڪ جبار ميمڻ، اسپتال ۾ نه رڳو مالي بي ضابطگين ۾ ملوث آهي پر پيراميڊيڪل عملي کي هيسائي ۽ ڌمڪائي رهيو آهي، جنهن سبب ڪم جو ماحول انتهائي خراب ٿي ويو آهي. اڳواڻن الزام هنيو ته اسپتالن ۾ دوائن سميت بنيادي سهولتن جي شديد کوٽ آهي، جنهن ڪري مريضن سان گڏ عملي کي به سخت مشڪلاتن کي منهن ڏيڻو پوي ٿو. هنن وڌيڪ چيو ته ٺٽي ضلعي جون اسپتالون مرف جي حوالي ٿيڻ کانپوءِ ڪرپشن وڌي وئي آهي ۽ عوامي مسئلا حل ٿيڻ بدران وڌي رهيا آهن. احتجاج ڪندڙن مطالبو ڪيو ته فوري طور رٽائرڊ ايم ايس جهرڪ کي هٽايو وڃي، ٺٽي جون سڀ اسپتالون مرف کان واپس وٺي گورنمينٽ جا مستقل ايم ايس مقرر ڪيا وڃن، جيئن ملازمن جي پريشاني گهٽجي ۽ مريضن کي بهتر سهولتون ملي سگهن. اڳواڻن خبردار ڪيو ته جيڪڏهن سندن جائز مطالبا ترت قبول نه ڪيا ويا ته احتجاج جو دائرو وڌايو ويندو ۽ ضلعي سطح تي تحريڪ هلائي ويندي.