ملير ۾ ڊجيٽل ميڊيا جي اهميت بابت سيمينار، نوجوانن ۽ شهرين جي وڏي تعداد ۾ شرڪت

آگاهي سيمينار ۾ نوجوانن، سياسي، سماجي ڪارڪنن، ڊجيٽل ميڊيا جي ماهرن ۽ شهرين جي شرڪت

ملير (عبدالرشيد مورجھريو) ملير ضلعي ۾ نجي ويب ٽي وي طرفان عوامي پريس ڪلب ملير ۾ “موجوده دور ۾ ڊجيٽل ميڊيا جي اهميت” جي موضوع تي آگاهي سيمينار منعقد ڪيو ويو، جنهن ۾ نوجوانن، سياسي، سماجي ڪارڪنن، ڊجيٽل ميڊيا جي ماهرن ۽ شهرين وڏي تعداد ۾ شرڪت ڪئي۔سيمينار کي خطاب ڪندي سنڌ حڪومت جي سيڪريٽري اسپورٽس اينڊ يوٿ افيئر منور علي مهيسر خاص مهمان طور خطاب ڪندي چيو ته موجوده دور ۾ ڊجيٽل ميڊيا نوجوانن لاءِ هڪ طاقتور آواز بڻجي چڪي آهي، جنهن ذريعي هو پنهنجي صلاحيتن کي اجاگر ڪري سگهن ٿا۔ هن چيو ته حڪومت نوجوانن کي ڊجيٽل مهارتون ڏيڻ لاءِ مختلف قدم کڻي رهي آهي، جيئن هو روزگار جا نوان موقعا حاصل ڪري سگهن، پاڪستان پيپلز پارٽي ملير جي ايم پي اي راجا رزاق بلوچ چيو ته ڊجيٽل ميڊيا عوامي مسئلن کي اعليٰ اختيارين تائين پهچائڻ ۾ اهم ڪردار ادا ڪري رهي آهي۔ هن چيو ته ملير سميت سنڌ جي ٻين علائقن جا مسئلا ڊجيٽل ميڊيا ذريعي وڌيڪ اثرائتي نموني سامهون اچي رهيا آهن، جيڪا مثبت تبديليءَ جي نشاني آهي دانشور راشد لکمير چيو ته ڊجيٽل ميڊيا صحافت جي دنيا ۾ نوان لاڙا متعارف ڪرايا آهن۔ هن زور ڏنو ته خبر ڏيڻ سان گڏ تصديق، سچائي ۽ صحافتي اخلاقن جي پابندي انتهائي ضروري آهي، ڇو ته غلط معلومات سماج لاءِ نقصانڪار ٿي سگهي ٿي قومي عوامي تحريڪ جي اڳواڻ منان شيخ چيو ته ڊجيٽل ميڊيا سنڌي ٻولي، ادب ۽ ثقافت جي واڌ ويجهه لاءِ اهم پليٽفارم آهي۔ هن چيو ته نوجوان ڊجيٽل ميڊيا ذريعي پنهنجي ٻولي ۽ سڃاڻپ کي عالمي سطح تي متعارف ڪرائي سگهن ٿا۔سماجي اڳواڻ سيد خدا ڏنو شاه چيو ته ڊجيٽل ميڊيا سماجي شعور کي وڌائڻ ۾ اهم ڪردار ادا ڪري رهي آهي۔ هن چيو ته سماجي مسئلن، انساني حقن ۽ عوامي ڀلائي بابت آگاهي لاءِ ڊجيٽل ميڊيا جو ڪردار انتهائي اهم بڻجي چڪو آهي۔نجي ٽي وي نيوز نيٽ ورڪ جي رستم لڪ چيو ته اسان جي نيوز چينل جو مقصد صرف خبرون ڏيڻ نه، پر سماج جي حقيقي مسئلن کي اجاگر ڪرڻ ۽ نوجوانن کي مثبت رخ ڏيارڻ آهي۔ هن چيو ته اهڙا سيمينار مستقبل ۾ به جاري رکيا ويندا سينيئر صحافي سامي ميمڻ چيو ته ڊجيٽل ميڊيا نوجوانن لاءِ اظهارِ راءِ، سکيا ۽ روزگار جا نوان در کولي رهي آهي۔ هن نوجوانن تي زور ڏنو ته هو ڊجيٽل پليٽفارمز کي ذميواري سان استعمال ڪن ۽ سماج ۾ مثبت تبديلي آڻڻ لاءِ پنهنجو ڪردار ادا ڪن۔سيمينار جي آخر ۾ نجي ٽي وي طرفان زندگي جي مختلف شعبن م نمايان ڪارڪردگي ڏيکاريندڙ شخصيتن کي ايوارڊ ۽ مهمانن کي سنڌي ٽوپيون ۽ اجرڪن جا تحفا ڏنا ويا سيمينار کي پيپلزپارٽي حيدرآباد جي اڳواڻ ميڊم عشرت حسين، عرفان عباسي، آغا شير گل سرڪي ۽ ٻين خطاب ڪيو ان موقعي تي شرڪت ڪندڙن عوامي پريس ڪلب ملير جي صدر جمشيد زھراڻي ،جيئي سنڌ محاذ جي فيض هيسباڻي، ايس يو پي جي شيراز سولنگي، شبير سوڍر، جيئي سنڌ بشير قريشي جي ڪامريڊ وهاب، سنڌي ادبي سنگت ملير جي غفور شاه تقوي، ۽ ٻين ان قدم کي ساراهيو ۽ چيو ته اهڙيون آگاهي تقريبون نوجوانن جي تربيت، شعور ۽ سماجي سڌاري لاءِ انتهائي ضروري آهن، ۽ مستقبل ۾ به اهڙن سيمينارن جي سخت ضرورت آهي۔