رزاق آباد ۾ گندگيءَ جا ڍير، انتظاميه صرف فوٽو شوٽ تائين محدود

مختلف هنڌن تي گٽر اٿلڻ سبب ناليون ۽ گٽيون گندي پاڻي جي تلاءَ ۾ تبديل

ملير (رپورٽ: عبدالرشيد مورجھريو)ملير جي علائقي رزاق آباد ۾ سيوريج نظام ناڪارا ٿي ويو مين هولز جي صفائي نه ٿيڻ سبب گٽر اٿلي پيا آهن، جڏهن ته مختلف هنڌن تي گندگيءَ جا وڏا ڍير لڳل آهن ان سلسلي ۾ ڳوٺاڻن عبدالوھاب گبول، اقبال ڪلمتي، صدام منظور شاهه ۽ ٻين چيو آهي ته ٽائون ميونسپل ڪارپورشن ابراهيم حيدري جو دفتر رزاق آباد ۾ هجڻ باوجود سڄو علائقو گٽر جي گندي پاڻي ۾ ٻڏل آھي ڳوٺاڻن موجب رزاق آباد ۽ ڀرپاسي جي علائقن جون سيوريج لائنون مڪمل طور تي ناڪارا ٿي چڪيون آهن، جڏهن ته ڪيترن ئي مين هولن جا ڍڪڻ غائب آهن، جنهن سبب ڪنهن به وقت ڪو وڏو جاني حادثو پيش اچي سگهي ٿو علاقي واسين جو چوڻ آهي ته ٽائون ابراهيم حيدري ۽ يوسي چوڪنڊي جا ڪائونسلرز ۽ چيئرمين بنيادي سهولتن جي فراهمي ۾ ناڪام ٿي ويا آهن جنهن سبب عوام کي اذيتناڪ زندگي گذارڻ تي مجبور ڪيو پيو وڃي علائقي واسين اعليٰ حڪومتي عملدارن کان مطالبو ڪيو آهي ته صورتحال جو فوري نوٽيس وٺي، فوٽو شوٽ نه پر عملي قدم کنيا وڃن، ۽ رزاق آباد سميت سڄي يوسي چوڪنڊي ۽ ٽائون ابراهيم حيدري ۾ صفائي ۽ سيوريج جو نظام بحال ڪيو وڃي..