مڪلي جي ڳوٺ ناريجا واسي شخص جو ناٺي جي مبينا زيادتين خلاف احتجاجي مظاهرو

ٺٽو(محمد شفيق ڀٽي)ناريجا ڳوٺ مڪلي جي رهواسي غلام رسول جوکيو عوامي پريس ڪلب ٺٽو ۾ پهچي پريس ڪانفرنس ڪندي چيو ته سندس نياڻي جي شادي چار پنج سال اڳ طاهر محمود پٽ ملوڪ جوکيو سان ٿي هئي. هن الزام هنيو ته طاهر محمود بغير سندس نياڻي کي اعتماد ۾ وٺڻ هڪ سال اڳ ٻي شادي ڪري، سندس نياڻي کي گهر مان بي دخل ڪري ڇڏيو ۽ 15 لکن کان وڌيڪ رقم جو سامان ۽ سون پاڻ وٽ رکي ڇڏيو.غلام رسول جوکيو وڌيڪ چيو ته هن ان معاملي خلاف 22-اي جي درخواست پڻ داخل ڪرائي آهي. هن الزام لڳايو ته طاهر محمود پنهنجي ڀاءُ محمد سومار ۽ هڪ گھارو ٿاڻي جي پوليس اهلڪار ڪامران جوکيو معرفت سندس ڌيءَ کي اغوا ڪرائي ڪيس تان هٿ کڻڻ ۽ سامان واپس نه وٺڻ لاءِ ڌمڪيون ڏئي رهيو آهي.پريس ڪانفرنس دوران غلام رسول جوکيو ايس ايس پي ٺٽو ۽ ٻين وس وارن کان پنهنجي ڌيءَ لاءِ تحفظ فراهم ڪرڻ جو مطالبو ڪندي چيو ته معاملي ۾ ملوث پوليس اهلڪار خلاف فوري ۽ قانوني ڪارروائي ڪئي وڃي.