ٺٽي ضلعي ۾ نيشنل پاليسي فار ويليوز ايجوڪيشن بابت اتفاقِ راءِ پيدا ڪرڻ بابت گڏجاڻي

گڏجاڻي ايڊيشنل ڊپٽي ڪمشنر ون غلام دستگير شيخ جي صدارت ۾ ٿي، عالم سڳورن جي به شرڪت

ٺٽو( محمد شفيق ڀٽي) ايڊيشنل ڊپٽي ڪمشنر ون غلام دستگير شيخ جي صدارت هيٺ ضلعي ٺٽي ۾ نيشنل پاليسي فار ويليوز ايجوڪيشن (NPVE) 2024 بابت آگاهي ۽ اتفاقِ راءِ پيدا ڪرڻ بابت درٻار ھال مڪلي ۾ هڪ اهم گڏجاڻي منعقد ڪئي وئي. گڏجاڻي ۾ خطيبن، امامن ۽ مذهبي عالمن وڏي انگ ۾ شرڪت ڪئي، جڏهن ته ضلعي جي مختلف مدرسن سان واسطو رکندڙ خطيب ۽ امام پڻ موجود هئا. گڏجاڻيءَ ۾ ايڊيشنل ڊپٽي ڪمشنر ون غلام دستگير شيخ NPVE 2024 پاليسي جي اهميت تي روشني وجهندي چيو ته قومي سطح تي اخلاقي، سماجي ۽ انساني قدرن کي هٿي وٺرائڻ وقت جي اهم ضرورت آهي. هن چيو ته مذهبي ادارا، مدرسه ۽ عالم سوسائٽي جي سڌاري ۾ مرڪزي ڪردار ادا ڪن ٿا ۽ حڪومت سنڌ مذهبي اڳواڻن کي ساٿي بڻائي سماج ۾ مثبت تبديلي آڻڻ چاهي ٿي. گڏجاڻي ۾ NPVE 2024 پاليسي جي مختلف پهلوئن تي تفصيلي خيال چونڊيا ويا جنهن دوران مذهبي عالمن پاليسي جي مقصدن، افاديت ۽ نوجوان نسل جي اخلاقي تربيت بابت پنهنجا خيال پيش ڪيا. شرڪت ڪندڙن پاليسي سان متفقه طور اتفاق ظاهر ڪندي ان جي حمايت ڪئي. گڏجاڻي ۾ اهو به فيصلو ڪيو ويو ته ضلعي ٺٽي جي مختلف مدرسن ۾ NPVE 2024 پاليسي بابت آگاهي ڏيڻ لاءِ خاص سيمينار منعقد ڪيا ويندا ته جيئن شاگردن ۽ استادن ۾ اخلاقي قدرن، رواداري ۽ سماجي ذميواري بابت شعور پيدا ڪري سگهجي. ايڊيشنل ڊپٽي ڪمشنر ون غلام دستگير شيخ مذهبي عالمن جي سهڪار کي ساراهيندي اميد ظاهر ڪئي ته گڏيل ڪوششن سان سماج ۾ مثبت تبديلي ايندي ۽ نوجوان نسل کي سٺن قدرن سان آراسته ڪرڻ ۾ ڪاميابي حاصل ٿيندي.