دنيا ۾ پکڙيل سنڌي سنڌ جا سفير آھن، وفاق سنڌ کي ڪرپشن جي ڪالوني بڻائي سئو سال پوئتي ڌڪي ڇڏيو آھي: اياز لطيف پليجو

اياز لطيف پليجو سان آمريڪا، برطانيه، جاپان، فلپائن ۽ ڪينيڊا کان آيل سنڌين جي وفد ملاقات

حيدرآباد (بيورو)قومي عوامي تحريڪ جي سربراھ اياز لطيف پليجو سان سندس رھائش گاھ تي آمريڪا، برطانيہ، جاپان، فلپائن ۽ ڪينيڊا کان آيل سنڌين جي وفد ملاقات ڪئي. وفد ۾ سانا جو صدر ڊاڪٽر مقبول ھاليپوٽو، سنڌي ايسوسئيشن آف جاپان جو صدر ايوب مھر، لنڊن کان پروفيسر لال چند لوھاڻو، اوساڪا جاپان کان نثار مھر، ڪيناڊا کان ڊاڪٽر رئوف شيخ، منيلا فلپائين کان خادم حسين، ڪيناڊا کان ناصر جمال پٺاڻ, برطانيہ کان شاد غلام علي، ڪيناڊا کان زاھد علي شاھ، فلپائين کان رباب مھر، جاپان کان محسن ايوب، اوساڪا کان ذوالفقار مھر ۽ ٻين شرڪت ڪئي اياز لطيف پليجو آيل مهمانن کي سنڌي ثقافت لنگھين جو تعفو پيش ڪري سندن شاندار آڌر ڀاءُ ڪيو ۽ عالمي، ملڪي ۽ سنڌ جي صورتحال تي تفصيلي غور ويچار ڪيو ويو. ان موقعي تي اياز لطيف پليجي ڳالھائيندي چيو تہ دنيا ۾ پکڙيل سنڌي سنڌ جا سفير آھن. پنھنجي محنت ۽ ذھانت سان پاڻ مڃائي رھيا آھن. انھن ملڪن جي ترقي ۾ پنھنجو حصو شامل ڪري رھيا آھن. لطيف امن، رواداري ۽ محبت جو پيغام ڏنو آھي. دنيا کي جنگين نہ امن جي ضرورت آھي. جيڪڏھن پيپلز پارٽي حڪومت چاھي تہ سنڌ دنيا جي ترقي سان گڏ بيٺل ھجي ھا. وفاق سنڌ کي ڪرپشن جي ڪالوني بنائي سئو سال پوئتي ڌڪي ڇڏيو آھي. اياز لطيف پليجي چيو تہ اڌ سنڌ ڌاڙيلن جي حوالي آھي. وسيلا، زمينون، درياھ وڪرو ڪيا ويا آھن. زراعت کي ھٿ وٺي تباھ ڪري آبادگارن ۽ ھارين جو معاشي قتل ڪيو ويو آھي. عورتون، ٻار ۽ اقليتون محفوظ ناھن. نياڻيون اغوا ڪري زبردستي مذھب تبديل ڪري شاديون ڪيون وڃن ٿيون. حڪمرانن سنڌ کي انساني حقن جي بدترين ڀڃڪڙين جو مثال بنائي ڇڏيو آھي. اياز لطيف پليجي چيو تہ ٻاھر رھندڙ سنڌي سنڌ ۾ تعليم ۽ صحت جي بھتري لاءِ ڪردار ادا ڪن. ٻاھرين ملڪن ۾ اسڪالرشپ ۽ نوڪرين جا موقعا حاصل ڪرڻ جا رستا ڏيکارين. سنڌ جا نوجوان محنتي ۽ ذھين آھن. ميرٽ ذريعي اڳتي وڌڻ چاھين ٿا.اياز لطيف پليجي چيو تہ پيپلزپارٽي سنڌ کي تباھ ۽ برباد ڪري ڇڏيو آهي سنڌ جي چيلھ ڀڃي ڇڏي آهي سنڌ ۾ گذريل 18 سالن کان وٺي حڪومت نہ بادشاھت قائم آهي پيپلزپارٽي سنڌ کي پنهنجي جاگير سمجهي ٿي. پيپلزپارٽي ۽ زرداري کي مڳي آهي اھي سمجھن ٿا تہ ست ڪڙور سنڌي سندن کيسي ۾ پيل آهن وڏيرا، سردار، جاگيردار، ڪرپٽ ڪامورا توهان جا غلام ٿي سگھن ٿا پيپلزپارٽي جو دماغ خراب آهي ست ڪڙور سنڌي غلام نہ آهن. ھن وقت سنڌ بک، ڪرپشن، بدامني لاقانونيت، منشيات، قبلائيت دھشتگردي ۾ گھيريل آهي. اياز لطيف پليجي چيو تہ سنڌ ۾ ڏوھ، ڌاڙيل ڪلچر، منشيات، غربت، صحت، تعليم ۽ ڪرپشن وڏا چئلينج آھن. سنڌ جا ماڻهو معاشي استحصال، بيڊ گورننس جو شڪار آھن. سنڌ کي تعليم ، سائنس، سياسي، سماجي ۽ معاشي انصاف ۽ ترقي گھرجي. غربت جو خاتمو ۽ برابري گھرجي.ان موقعي تي قومي عوامي تحريڪ جو مرڪزي جنرل سيڪريٽري مظھر راھوجو، نذير ٿھيم، ايڊووڪيٽ ساحر پليجو، زينت سمون، شھربانو راھوجو، نصرت خاصخيلي، صبا سمون، جوش اياز ۽ ٻيا موجود ھئا.