ترکیہ نے فضائی تاریخ میں نیا باب رقم کر دیا، بغیر پائلٹ جنگی طیاروں کی خودکار فارمیشن پرواز کامیاب

ترکیہ کے جدید بغیر پائلٹ جنگی طیارے قزل ایلما نے پہلی بار مکمل خودکار قریبی فارمیشن پرواز انجام دے کر عالمی ہوا بازی میں ایک اہم سنگِ میل عبور کر لیا۔

ترکیہ کے جدید ترین بغیر پائلٹ جنگی طیارے بائیکار قزل ایلما نے عالمی فضائی تاریخ میں ایک غیر معمولی کامیابی حاصل کر لی ہے۔ پہلی مرتبہ دو بغیر پائلٹ جنگی طیاروں نے بغیر کسی انسانی مداخلت کے مکمل خودکار انداز میں قریبی فارمیشن پرواز کامیابی سے مکمل کی، جسے دفاعی ماہرین مستقبل کی فضائی جنگ کی سمت ایک فیصلہ کن پیش رفت قرار دے رہے ہیں۔ یہ تاریخی تجربہ چورلو میں واقع آقنجی فلائٹ ٹریننگ اینڈ ٹیسٹ سینٹر میں کیا گیا، جہاں قزل ایلما کے دو پروٹوٹائپس PT3 اور PT5 نے بیک وقت پرواز بھری۔ دونوں طیارے یکے بعد دیگرے فضا میں بلند ہوئے اور کسی پائلٹ یا زمینی کنٹرول کے بغیر ہم آہنگ انداز میں قریبی کول (Close Formation) پرواز انجام دی۔ بائیکار کی جانب سے تیار کردہ جدید اسمارٹ فلیٹ اوٹونومی الگورتھمز کی مدد سے دونوں طیاروں نے ایک دوسرے کے مقابل اپنی پوزیشنز خودکار طور پر ترتیب دیں اور انتہائی حساس فضائی فاصلہ برقرار رکھتے ہوئے ہم وقت حرکات مکمل کیں۔ ماہرین کے مطابق یہ صلاحیت اب تک صرف انسانی پائلٹس سے لیس جدید جنگی طیاروں تک محدود سمجھی جاتی تھی۔ دفاعی تجزیہ کاروں کا کہنا ہے کہ یہ کامیابی اس بات کا واضح ثبوت ہے کہ مستقبل میں پیچیدہ فضائی مشنز، جن میں درستگی، تیز ردِعمل اور مشترکہ حکمتِ عملی درکار ہوتی ہے، بغیر پائلٹ نظاموں کے ذریعے بھی مؤثر انداز میں انجام دیے جا سکیں گے۔ قزل ایلما کی یہ آزمائش مستقبل کی فضائی جنگ میں ملٹی وہیکل خودکار آپریشنز کی بنیاد فراہم کرتی ہے، جہاں متعدد بغیر پائلٹ جنگی طیارے مشترکہ کمانڈ کے تحت مربوط کارروائیاں انجام دے سکیں گے۔ اس کامیابی کو عالمی میڈیا میں بھرپور کوریج ملی، جہاں بین الاقوامی خبر رساں اداروں نے اسے جدید فضائی جنگ میں ایک ٹرننگ پوائنٹ قرار دیا۔ رپورٹس کے مطابق اس پیش رفت نے خودکار جنگی ہوا بازی کے میدان میں ترکیہ کو قائدانہ مقام دلایا ہے اور عالمی دفاعی توازن میں بتدریج تبدیلی کی نشاندہی کی ہے۔ بائیکار کے چیئرمین سیلچوق بائیراکتار نے اس کامیابی کو دنیا میں پہلی مرتبہ قرار دیتے ہوئے کہا کہ یہ ترکیہ کی خود انحصار دفاعی ٹیکنالوجی کی واضح مثال ہے۔ جبکہ بائیکار کے جنرل منیجر حلوق بایئر اکتار نے کہا کہ ہم تقلید کرنے والے نہیں بلکہ مستقبل کی راہیں متعین کرنے والے ہیں۔