شاہ سلمان کی صدارت میں سعودی کابینہ کا اجلاس، یمن میں کشیدگی کم کرنے کیلئے عرب اتحاد کے اقدامات کی توثیق

سعودی کابینہ نے یمن کی سلامتی اور قانونی حکومت کی حمایت کا اعادہ کرتے ہوئے خطے میں کشیدگی روکنے کیلئے عرب اتحاد کے اقدامات کی مکمل تائید کی۔

سعودی عرب کے فرمانروا شاہ سلمان بن عبدالعزیز کی زیرِ صدارت سعودی کابینہ کا اہم اجلاس منعقد ہوا، جس میں یمن کی موجودہ صورتحال اور علاقائی سلامتی پر تفصیلی غور کیا گیا۔ اجلاس کے بعد سعودی وزیر اطلاعات سلمان بن یوسف کی جانب سے جاری اعلامیے میں کہا گیا کہ سعودی عرب اپنی قومی سلامتی کو لاحق کسی بھی خطرے سے نمٹنے کیلئے تمام دستیاب وسائل بروئے کار لائے گا۔ اعلامیے کے مطابق کابینہ نے یمن کی سلامتی، صدارتی کونسل اور قومی حکومت کی مکمل حمایت کے عزم کا ایک بار پھر اعادہ کیا۔ اجلاس میں یمنی صوبوں حضرموت اور المہرہ میں عرب اتحاد کی جانب سے کیے گئے اقدامات کو سراہا گیا اور یمن میں کشیدگی روکنے کیلئے عرب اتحاد کی کوششوں کی بھرپور حمایت کا اظہار کیا گیا۔ کابینہ نے جمہوریہ یمن کی قانونی حکومت کے اس مؤقف کی بھی حمایت کی جس میں اماراتی فوج کے انخلاء کا مطالبہ کیا گیا ہے، اور امید ظاہر کی کہ متحدہ عرب امارات اس فیصلے پر عملدرآمد کرے گا۔ دوسری جانب امریکی وزیر خارجہ مارکو روبیو نے سعودی وزیر خارجہ فیصل بن فرحان سے ٹیلیفونک رابطہ کیا، جس میں یمن میں پیدا ہونے والی کشیدگی پر تبادلہ خیال کیا گیا۔ امریکی محکمہ خارجہ کے مطابق دونوں رہنماؤں نے خطے میں استحکام اور سلامتی سے متعلق امور پر گفتگو کی۔ واضح رہے کہ حالیہ دنوں سعودی اتحاد نے یمن کی ایک بندرگاہ کی جانب جانے والے اسلحہ بردار جہازوں کے خلاف فضائی کارروائی کی تھی، جس کے بعد یمن نے متحدہ عرب امارات کے ساتھ مشترکہ دفاعی معاہدہ منسوخ کرنے کا اعلان کیا۔ اس پیش رفت کے بعد متحدہ عرب امارات نے بھی یمن میں اپنے انسدادِ دہشت گردی یونٹس ختم کرنے کا اعلان کر دیا ہے، جس سے خطے کی صورتحال مزید حساس ہو گئی ہے۔