ضلعي شڪارپور ۾ پوليو جي عالمي ڏهاڙي جي حوالي سان جاڳرتا ريلي ڪڍي وئي

ھيرانند گنگا ٻائي اسپتال کان پريس ڪلب تائين جاڳرتا ريلي ۾ ڊپٽي ڪمشنر شڪيل احمد ابڙو ۽ ٻيا شريڪ

شڪارپور(احسان ابڙو)ضلعي شڪارپور ۾ پوليو جي عالمي ڏهاڙي جي حوالي سان جاڳرتا ريلي ڪڍي وئي ھيرانند گنگا ٻائي اسپتال کان پريس ڪلب شڪارپور تائين جاڳرتا ريلي ۾ ڊپٽي ڪمشنر شڪارپور شڪيل احمد ابڙو، صحت کاتي جا ضلعي عملدار، پوليو فوڪل پرسن، نيشنل پروگرام جا عملدار، سوشل ويلفيئر آفيسرز، سرسو، ۽ وڏي انگ ۾ ليڊي هيلٿ ورڪرز ۽ ڊاڪٽرن شرڪت ڪئي. پريس ڪلب شڪارپور ۾ ريلي جي اختتام وقت صحافين سان ڳالهائيندي، ڊپٽي ڪمشنر شڪارپور، پوليو ورڪرز کي خراج تحسين پيش ڪندي چيو ته پوليو ورڪرز گهر گهر وڃي ٻارن کي پوليو کان بچاء جا ڦڙا پيارين ٿا، جنهن لاء ضلعي انتظاميه کين خراج تحسين پيش ڪري ٿي. پوليو جي خاتمي جي مهم کي اجاگر ڪندي ڊپٽي ڪمشنر شڪارپور چيو ته پوليو هڪ موذي مرض آهي، جنهن جو ڦيلاء کي پوليو جي ڦڙن ذريعي روڪي سگهجي ٿو. هن چيو ته عوام کي اپيل ڪريان ٿو ته پنهنجي ٻارن کي پوليو جا 2 ڦڙا ضرور پيياريو جئين هو سڄي زندگي جي معذوري کان بچي سگهن. ان موقعي تي ڊپٽي ڪمشنر شڪارپور ٻڌايو ته 17 نومبر کان ارڙي جي مهم شروع ٿي رهي آهي، ان دوران اوهان جي علائقي ۾ صحت کاتي جون ٽيمون اينديون ۽ پنهنجي 6 مهينن کان 5 سالن تائين عمر جي ٻارڙن کي ارڙي جي بچاءُ واري ويڪسين لڳرايو ۽ ٽيمن سان تعاون ڪريو ڇو ته ارڙي هڪ وچرندڙ بيماري آهي اسان ۽ توهان کي صحتمند معاشرو بڻائڻو آهي.