ڊپٽي ڪمشنر نويدالرحمان لاڙڪ جي صدارت هيٺ اجلاس, عمرڪوٽ ۾ جاري “ممتا پروگرام” بابت تفصيلي بريفنگ ڏني وئي

پروگرام جي اڳڀرائي، ڪارڪردگي، مسئلن ۽ حڪمت عملي تي به تفصيلي غور

عمرڪوٽ (رپورٽ:ڪانجي مل رکيسر) ڊپٽي ڪمشنر ۽ چيئرمين ڊسٽرڪٽ ڪوآرڊينيشن ڪميٽي براءِ سنڌ سوشل پروٽيڪشن اٿارٽي عمرڪوٽ نويدالرحمان لاڙڪ جي صدارت هيٺ ڊپٽي ڪمشنر آفيس جي درٻار هال ۾ هڪ اهم اجلاس منعقد ٿيو، ان موقعي تي ضلعي ڪوآرڊينيٽر سنڌ سوشل پروٽيڪشن اٿارٽي عمرڪوٽ ميڊم خديجه قبره ضلعي عمرڪوٽ ۾ جاري “ممتا پروگرام” بابت اجلاس کي تفصيلي بريفنگ ڏني، هن ٻڌايو ته هي پروگرام ماءُ ۽ ٻار جي صحت، خوراڪ ۽ مالي سهائتا لاءِ حڪومت سنڌ ۽ ورلڊ بينڪ جي سهڪار سان شروع ڪيو ويو آهي، جنهن جو مقصد ضلعي جي مستحق عورتن تائين بهتر سهولتون پهچائڻ آهي، اجلاس ۾ پروگرام جي اڳڀرائي، ڪارڪردگي، درپيش مسئلن ۽ ايندڙ حڪمت عملي تي به تفصيلي غور ڪيو ويو، ان موقعي تي ميڊم خديجه قبره ٻڌايو ته هن وقت تائين 65366 بينيفشريز رجسٽر ٿي چڪيون آهن، جن مان گذريل مهيني 13044 عورتن جي ڪمپلائنس ٿي آهي، جڏهن ته ضلعي ۾ هن وقت 51 سينٽر ڪم ڪري رهيا آهن، ان موقعي تي ڊپٽي ڪمشنر نويدالرحمان لاڙڪ اجلاس ۾ هدايت ڪئي ته ممتا پروگرام تحت وڌيڪ کان وڌيڪ مستحق عورتن تائين سهولتون پهچائڻ لاءِ قدم تيز ڪيا وڃن ۽ شفافيت کي يقيني بڻايو وڃي، هن چيو ته سماجي تحفظ جا اهي منصوبا عوامي ڀلائي لاءِ انتهائي اهم آهن، ۽ انهن جي ڪاميابي صرف ضلعي سطح تي مؤثر عملدرآمد سان ممڪن آهي، ان موقعي تي ڊپٽي ڪمشنر وڌيڪ چيو ته صوبائي ايميونائيزيشن پروگرام جو ڊيٽا ممتا پروگرام سان شيئر ڪيو وڃي، جيئن پروگرام کي وڌيڪ مؤثر بڻائي سگهجي، ان موقعي تي اجلاس ۾ ايڊيشنل ڊپٽي ڪمشنر ٽو عمران، اسسٽنٽ ڪمشنر سامارو ۽ پتھورو سنجي ڪمار ترڪيو، اسسٽنٽ ڪمشنر ڪنري محمد خان، ڊائريڪٽر پرائيويٽ اسڪول خان محمد، اي ڊي ايڇ او ڊاڪٽر لڇمن داس، ايم ايس سول اسپتال عمرڪوٽ ڊاڪٽر فريد احمد، ڊپٽي ڊائريڪٽر سوشل ويلفيئر نور محمد شيخ، ضلعي اطلاعت آفيسر محمد اسلم ڀٽي، ضلعي فوڪل پرسن اي پي آءِ ڊاڪٽر شير مھر، ضلعي فوڪل پرسن پوليو ڊاڪٽر وجي ڪمار، ڊي ايم پي پي ايڇ آءِ شرف الدين ميمڻ، ۽ مختلف شعبن جا آفيسر، سماجي تحفظ ڪاميٽي جا ميمبر ۽ نمائندا پڻ موجود هئا۔