ريجنل ڊائريڪٽر محتسب ٺٽو پاران بوائز ھاءِ اسڪول مڪلي ۾ آگاهي سيمينار منعقد

صوبائي محتسب جو ادارو عوام جون جائز شڪايتون حل ڪرڻ لاءِ ڪوشان آهي: ھارون احمد خان

ٺٽو( شفيق ڀٽي) ريجنل ڊائريڪٽر محتسب ٺٽو پاران گورنمينٽ بوائز ھاءِ اسڪول مڪلي ۾ آگاهي سيمينار منعقد ڪيو ويو ريجنل ڊائريڪٽر محتسب ٺٽو ھارون احمد خان چيو آهي ته صوبائي محتسب جو ادارو عوام جون جائز شڪايتون حل ڪرڻ لاءِ ڪوشان آهي جيڪو بغير ڪنهن وڪيل جي بلاتفريق ماڻھن کي جلد کان جلد انصاف جي فراهمي لاءِ پنھنجو ڀرپور ڪردار ادا ڪري رهيو آهي. اهڙن خيالن جو اظهار هُن گورنمينٽ بوائز ھاءِ اسڪول مڪلي ۾ صوبائي محتسب اداري جي اهميت، فائدن ۽ طريقيڪار بابت منعقد آگاهي سيمينار کي خطاب ڪندي ڪيو. ان موقعي تي ھُن شاگردن کي صوبائي محتسب جي مقصد، اثر ۽ ڪارڪردگي بابت تفصيلي آگاهي پڻ ڏني. هن چيو ته محتسب جو ادارو غير جانبدار، مفت ۽ تيز انصاف جي فراھمي لاءِ قائم ٿيل آهي، جتي ڪنهن به شهري جي شڪايت کي بغير دير جي قانون مطابق ڏٺو وڃي ٿو. ھُن ٻڌايو تہ سرڪاري کاتن پاران ماڻهن سان ناانصافي، جائز ڪم ۾ دير، بدانتظامي يا لاپرواهي، سرڪاري آفيسرن جو غيرذميوار رويو يا قانوني ذميوارين کان انحراف، عوامي خدمتن ۾ غير ضروري تاخير ۽ پبلڪ ڊيلنگ ۾ بدسلوڪي، سرڪاري رڪارڊ، سرٽيفڪيٽ يا ضروري ڪيسن ۾ غيرقانوني رڪاوٽون ۽ مشڪلاتون، پوليس، تعليم، صحت، ميونسپل خدمتن ۽ ٻين کاتن ۾ ٿيندڙ انتظامي بيقاعدگيون، شڪايتن جو نه ٻڌڻ ۽ نظرانداز ڪرڻ بابت نوٽيس وٺڻ محتسب اعليٰ جي دائري اختيار ۾ آھي. ھُن چيو ته صوبائي محتسب جي هدايتن تحت عوام کي انصاف فراهم ڪيو پيو وڃي، مُلڪ ۾ انصاف فراهم ڪندڙ ادارا موجود آهن پر انھن تائين رسائي لاءِ بنيادي معلومات نه هجڻ سبب ڪيترائي ماڻهو پنھنجي حقن کان محروم آهن. ريجنل ڊائريڪٽر جو چوڻ هو ته شهري ڪنهن به صوبائي کاتي جي خلاف پنهنجي جائز شڪايت صرف هڪ سادي ڪاغذ تي موڪلي سگهن ٿا، سندن جائز مسئلو جلد کان جلد حل ڪرائڻ لاءِ قدم کنيا ويندا. هن چيو ته اسان جا دروازا هر انصاف گهرندڙ لاءِ کليل آهن. ان موقعي تي اسڪول انتظاميہ پاران درپيش مسئلا پيش ڪيا ويا، جن جي حل لاءِ ريجنل ڊائريڪٽر کين يقين پڻ ڏياريو. آگاھي سيمينار کي اسسٽنٽ ڪمشنر ٺٽو شاڪر فھيم، سينيئر ھيڊ ماسٽر غلام نبي خشڪ ۽ ٻين پڻ خطاب ڪيو. سيمينار ۾ سب رجسٽرار محمد حنيف پنھور، ھيڊ ماسٽر علي فرحان شيخ، علي اصغر بروھي، سلمان جاکرو، امير عثمان، علي محمد سومرو سميت آستادن، شاگردن ۽ اسڪول انتظاميہ شرڪت ڪئي.