سنڌي ادبي سنگت شاخ ملير جي دستوري گڏجاڻي، سيد غفور شاھ تقوي، راشد لکمير، مجيب سنڌي ۽ ٻين شاعري پيش ڪئي

گڏجاڻي رابطا سيڪريٽري نامياري اديب راشد لکمير جي صدارت هيٺ

ملير (رپورٽ: عبدالرشيد مورجھريو) سنڌي ادبي سنگت شاخ ملير جي دستوري گڏجاڻي ملير جي هڪ سر سبز باغ ۾ ڪراچي جي رابطا سيڪريٽري نامياري اديب راشد لکمير جي صدارت هيٺ ٿي گذري، جنھن ۾ سيد غفور شاھ تقوي غزل، راشد لکمير غزل، مجيب سنڌي نظم، سڪندر سرواڻ غزل ۽ اصغر مهرائي غزل پيش ڪيو، جڏهن ته اديب الرحمان ڪورائي، رستم جوکيو، وحيد لاشاري، اقبال احمد، ۽ سليم اسحاق شرڪت ڪئي، ان موقعي تي صدارتي راءِ ڏيندي راشد لکمير چيو ته سنڌي ادبي سنگت شاخ ملير سڄي سنڌ ۾ مثالي شاخ آهي، جنهن تمام سهڻا سرجڻھار پيدا ڪيا آهن، ملير شاخ ۾ هر ڀيري نئون ماحول ملي ٿو، ملير جي سرسبز ماحول ۾ پروگرام ۽ گڏجاڻيون ڪري نواڻ آندي آهي ۽ سنڌي ادب کي سائو ڪري ڇڏيو آهي، ڪراچي ۾ ملير شاخ جا دوست ادبي ڪمن ۾ سڀ کان وڌيڪ سرگرم آهن، اصغر مهرائي محنتي سيڪريٽري ۽سٺو مهمان نواز به آهي جنهن بهترين پروگرام ڪرايا آهن. راشد لکمير چيو ته تنقيد هڪ پاڪ عمل آهي، پر هڪ تخليق تي اصولن ۽ ضابطن تحت تنقيد ڪرڻ گهرجي، اڄڪلھ نوجوان سٺو ادب لکي رهيا آهن، اسان وٽ ڪيترائي مثالي تخليقڪار ٿي گذريا آهن ۽ اڳتي به سٺا تخليقڪار پيدا ٿيندا رهندا.