ڊپٽي ڪمشنر نوشهروفيروز محمد ارسلان سليم جي صدارت هيٺ پوليو مهم بابت اجلاس

مهم دوران هر ممڪن ڪوشش ڪرڻ گهرجي ته جيئن ڪو به ٻار پوليو جا ڦڙا پيئڻ کان رهجي نه وڃي: محمد ارسلان سليم

نوشهروفيروز (ڊ ر) : ڊپٽي ڪمشنر نوشهروفيروز محمد ارسلان سليم جي صدارت هيٺ سندس آفيس ۾ 15 کان 19 ڊسمبر 2025 تائين ھلائي ويندڙ پوليو خلاف مهم جي انتظامن جو جائزو وٺڻ لاءِ هڪ اجلاس منعقد ڪيو ويو. اجلاس ۾ ضلعي صحت آفيسر ڊاڪٽر غلام قادر چانڊيو، ضلعي مئنيجر پي پي ايڇ آءِ ڪيپٽن (ر) محسن علي، فوڪل پرسن اي پي آءِ ڊاڪٽر عبدالستار، ڪميونيڪيشن آفيسر علي اڪبر جوڻيجو، ڊاڪٽر وجي ڪمار، سڀني تعلقن جا تعلقي سپروائيزر، اسسٽنٽ ڪمشنر ۽ ٻيا لاڳاپيل آفيسر شرڪت ڪئي. اجلاس کي خطاب ڪندي ڊپٽي ڪمشنر چيو ته سڀني لاڳاپيل آفيسرن کي هن مهم دوران هر ممڪن ڪوشش ڪرڻ گهرجي ته جيئن پنجن سالن تائين جو ڪو به ٻار پوليو جا ڦڙا پيئڻ کان رهجي نه وڃي. هن چيو ته مهم دوران ويڪسين جي ڪولڊ چين جو خاص خيال رکيو وڃي. سڀني صحت مرڪزن جا آئي ايل آر ۽ ريفريجريٽر ٽيگ ڊوائيسز صحيح ۽ ڪم ڪندڙ حالت ۾ آهن. هن ٽيمن کي مڪمل تربيت ۽ نگراني فراهم ڪرڻ جي هدايت ڪئي. هن چيو ته مهم کان اڳ مائڪرو پلان کي اپڊيٽ ڪيو وڃي ته جيئن ٽيمن جي ڪارڪردگي بهتر بڻائي سگهجي. هن چيو ته سڀئي لاڳاپيل ادارا صحت کاتي سان تعاون ڪندا ۽ پوليس پوليو ٽيمن کي سيڪيورٽي فراهم ڪندي. هن سڀني ٽيمن تي زور ڏنو ته اهي وڌيڪ محنت ڪن. ان کان اڳ صحت کاتي جي آفيسرن اجلاس کي پوليو مهم لاءِ ڪيل انتظامن بابت بريفنگ ڏني ۽ چيو ته مهم لاءِ ڪل 1025 ٽيمون ٺاهيون ويون آهن جن ۾ 342,312 ٻارن کي پوليو کان بچاءُ جا قطرا پياريا ويندا، جن ۾ 893 موبائل، 18 ايس ايم ٽي، 75 فڪسڊ ۽ 41 ٽرانزٽ ٽيمون شامل آهن، جن لاءِ ضلعي ۾ 68 ٽيم سپورٽ سينٽر قائم ڪيا ويندا.