پشاور: ایف سی ہیڈکوارٹر پر حملہ، 3 دہشتگرد ہلاک، 3 ایف سی اہلکار شہید

ین خودکش حملہ آور مارے گئے جبکہ ایف سی کے تین اہلکار شہید ہوگئے

پشاور (ویب ڈیسک): پشاور میں فیڈرل کانسٹیبلری (ایف سی) ہیڈکوارٹر پر دہشتگردوں کا حملہ ناکام بنا دیا گیا، تین خودکش حملہ آور مارے گئے جبکہ ایف سی کے تین اہلکار شہید ہوگئے۔ سی سی پی او پشاور ڈاکٹر میاں سعید نے ایف سی ہیڈکوارٹر پر حملے کی تصدیق کرتے ہوئے بتایا کہ حملہ صبح 8 بج کر 10 منٹ پر ہوا۔ حملے کے بعد سنہری مسجد روڈ کو ٹریفک کے لیے بند کردیا گیا اور ٹریفک کو صدر روڈ کی طرف موڑ دیا گیا۔ سی سی پی او پشاور کے مطابق تین خودکش حملہ آوروں نے فیڈرل کانسٹیبلری پر حملہ کیا، جن میں سے ایک نے مرکزی گیٹ پر خود کو دھماکے سے اڑا لیا، جبکہ دو حملہ آور ایف سی ہیڈکوارٹر کے اندر داخل ہوگئے۔ سی سی پی او نے بتایا کہ ایف سی اہلکاروں نے دونوں حملہ آوروں پر فائرنگ کی، تینوں خودکش حملہ آور مارے گئے۔ ایف سی کے جوانوں نے بہادری سے حملہ ناکام بنایا۔ ڈپٹی کمانڈنٹ جاوید اقبال نے میڈیا سے گفتگو کرتے ہوئے کہا کہ حملے میں تینوں خودکش حملہ آور مارے گئے ہیں۔ فیڈرل کانسٹیبلری کے جوانوں نے دلیری سے دہشتگردوں کا مقابلہ کیا۔ حملے میں ایف سی کے تین اہلکار شہید ہوئے۔