امریکا میں انوکھی سہولت: ٹریفک جرمانے کے بدلے خوراک عطیہ کرنے کا ’فوڈ فار فائن‘ پروگرام متعارف

اوکلاہوما کے شہر چکاشا میں شہری ٹریفک خلاف ورزیوں اور لائبریری فیس میں رعایت کھانے پینے کی اشیاء عطیہ کرکے حاصل کر سکیں گے۔

امریکی ریاست اوکلاہوما کے شہر چکاشا میں بلدیہ اور پبلک لائبریری نے ایک منفرد اور انسان دوست اقدام کا آغاز کر دیا ہے جسے ”فوڈ فار فائن“ پروگرام کا نام دیا گیا ہے۔ اس اسکیم کے تحت شہری ٹریفک چالان، میونسپل خلاف ورزیوں اور لائبریری کی زائد المیعاد کتابوں کے جرمانے کم یا مکمل ختم کروانے کے لیے خراب نہ ہونے والی خوراک عطیہ کر سکتے ہیں۔ ذرائع کے مطابق یہ خصوصی پروگرام نومبر کے باقی دنوں اور پورے دسمبر میں جاری رہے گا، جس میں شہری مختلف جرمانوں پر رعایت کے بدلے خوراک جمع کرا سکیں گے۔ بلدیہ کی جانب سے جاری اعلامیے میں کہا گیا ہے کہ یہ پروگرام نہ صرف عوام کو مالی ریلیف فراہم کرے گا بلکہ کمیونٹی کی خدمت کا موقع بھی دے گا۔ بلدیہ کی عدالت کے مطابق اس پروگرام کے تحت ہر خوراک پر مبنی ایک آئٹم کے بدلے 10 ڈالر جرمانہ کم کیا جائے گا، جبکہ ایک فرد زیادہ سے زیادہ 100 ڈالر تک رعایت حاصل کر سکتا ہے۔ یہ سہولت 26 نومبر تک دستیاب ہوگی۔ گزشتہ سال اس پروگرام میں 30 افراد نے حصہ لیا تھا، اور عطیہ کی گئی خوراک کی مجموعی مالیت، جرمانے میں رعایت کی شکل میں، 2,826 ڈالر کے برابر تھی۔ ان شرکاء میں ایسے لوگ بھی شامل تھے جنہوں نے ضرورت سے زیادہ خوراک عطیہ کی، یا پھر محض خدمتِ انسانیت کے جذبے کے تحت پروگرام میں شامل ہوئے، چاہے ان پر کوئی فیس یا جرمانہ نہ تھا۔