خواجہ آصف کا محمود غزنوی پر بیان لاعلمی کی انتہا ہے، بیرسٹر سیف کا سخت ردعمل

پی ٹی آئی رہنما بیرسٹر سیف نے خواجہ آصف کے محمود غزنوی سے متعلق بیان کو تاریخی لاعلمی اور سنجیدگی سے عاری قرار دے دیا۔

پاکستان تحریک انصاف (پی ٹی آئی) کے رہنما بیرسٹر محمد علی سیف نے خواجہ آصف کے محمود غزنوی سے متعلق حالیہ بیان پر شدید تنقید کرتے ہوئے کہا ہے کہ خواجہ آصف ’’شاہ سے زیادہ شاہ کے وفادار‘‘ بننے کی کوشش میں مسلسل غیر ذمہ دارانہ اور بے بنیاد باتیں کر رہے ہیں۔ بیرسٹر سیف کا کہنا تھا کہ خواجہ آصف کا بیان ظاہر کرتا ہے کہ وہ تاریخ سے مکمل طور پر لاعلم ہیں۔ انہوں نے نشاندہی کی کہ پاکستان کے ایک اہم میزائل کا نام بھی ’’غزنوی‘‘ ہے، جسے دیکھ کر بھی خواجہ آصف کو تاریخی اہمیت کا اندازہ نہیں ہو سکا۔ پی ٹی آئی رہنما نے مزید کہا کہ: خواجہ آصف سے شائستہ یا ذمہ دارانہ گفتگو کی توقع رکھنا فضول ہے۔ وہ غیر سنجیدہ شخصیت ہیں اور کسی بڑے عوامی عہدے کے اہل نہیں۔ بیرسٹر سیف کا یہ جارحانہ ردعمل سیاسی حلقوں میں ایک اور لفظی محاذ کے طور پر دیکھا جا رہا ہے، جو موجودہ سیاسی درجہ حرارت کو مزید بڑھا رہا ہے۔