ابراهيم حيدري ۾ ڪوئلي جي بجلي گهرن خلاف فشر فوڪ فورم جو احتجاج

هي احتجاج “ايشيائي احتجاج 2025” جو حصو هو، جنهن تحت ايشيا جي 7 ملڪن جي 70 شهرن ۾ گڏيل احتجاج منظم ڪيا ويا

ملير (رپورٽ: عبدالرشيد مورجھريو)پاڪستان فشر فوڪ فورم پاران پنهنجي ماحولياتي ورڪرن سان گڏجي اڄ ابراهيم حيدري ۾ ڪوئلي جي بجلي گهرن خلاف احتجاج ڪيو ويو. هي احتجاج “ايشيائي احتجاج 2025” جو حصو هو، جنهن تحت ايشيا جي 7 ملڪن جي 70 شهرن ۾ گڏيل احتجاج منظم ڪيا ويا. احتجاجي مارچ مئن فشري بندر کان مل جيٽي تائين ڪيو ويو، جنهن ۾ ڪوئلي جي پاور پلانٽن کي فوري طور ختم ڪرڻ ۽ توانائي جي منصفانه منتقلي جو مطالبو ڪيو ويو.هن موقعي تي فشر فوڪ فورم جي مرڪزي جنرل سيڪريٽري سعيد بلوچ، انفارميشن سيڪريٽري ايوب شان خاصخيلي، ضلعي صدر مجيد موٽاڻي ۽ جنرل سيڪريٽري طالب ڪڇي خطاب ڪندي چيو ته ڪوئلو ملڪ جي ماهيگيرن، مزدورن ۽ هارين جي روزگار ۽ زندگين کي تباهه ڪري ڇڏيو آهي. مقامي ۽ درآمدي ڪوئلي جي استعمال سان هوا ۽ پاڻي مڪمل طور آلودگي جو شڪار ٿي رهيا آهن. ٿر ڪوئلي جا منصوبه مقامي ماڻهن جي روزگار ۽ زمينن کي وڏو نقصان پهچائي رهيا آهن، جڏهن⁠تہ ساھيھوال پاور پلانٽ زراعت جي تباهي جو به سبب بڻيو آهي.رهنمائن جو چوڻ هو ته ڪوئلي تي ڀاڙڻ بدران ملڪ ۾ حقيقي ۽ قابلِ تجديد توانائي ۾ سيڙپڪاري ڪئي وڃي ته جيئن ماڻهن کي فائدو ملي.