نوشهروفيروز ۾ گل ٽائون مان ٽي ڏينهن اڳ مبينا اغوا ٿيل صنم چانڊيو جي بازيابي لاءِ احتجاج

هٿياربند 3ڏينهن اڳ گهر تي حملو ڪري نياڻي صنم چانڊيو کي اغوا ڪري ويا: انور چانڊيو

نوشهروفيروز (ڊ ر) نوشهروفيروز جي علائقي گل ٽائون مان ٽي ڏينهن اڳ اغوا ٿي ويل صنم چانڊيو جي بازيابي لاءِ وارثن طرفان سخت احتجاج ڪيو ويو ۽ انصاف فراهم ڪرڻ جو مطالبو ڪيو ويو۔ مغوي جي والد انور چانڊيو الزام لڳايو ته هٿياربندن سندن گهر تي حملو ڪري منهنجي نياڻي صنم چانڊيو کي اغوا ڪري ويا۔ هن دعويٰ ڪئي ته هن سنگين واردات ۾ دادو جا بدنام زمانه ڏوهي عاشق چانڊيو، اصغر چانڊيو، مظهر، غلام علي، مرتضىٰ ۽ لاکو چانڊيو سميت ڪيترائي ماڻهو ملوث آهن۔ ڇوڪري جي والده شمشاد چانڊيو چيو ته اغوا ۾ ملوث سڀني ماڻهن خلاف اڳ ئي دادو ۾ اغوا ۽ قتل جا ڪيس داخل آهن، پر ان جي باوجود پوليس اڃا تائين ڪا به ڪارروائي نه ڪئي آهي۔ مغوي نينگري جي خالہ اميران چانڊيو الزام لڳايو ته وارثن طرفان ايف آءِ آر داخل ٿيڻ باوجود پوليس اغواڪارن جي گرفتاري ۾ مڪمل طور ناڪام ٿي آهي۔ وارثن جو چوڻ هو ته اسين غريب ماڻهو آهيون، بااثر جوابدارن اڳيان بي وس آهيون ۽ پنهنجي ڌيءَ جي زندگيءَ بابت سخت پريشان آهيون۔ هنن سنڌ جي وزيراعلیٰ، صوبائي وزير ضياءالحسن لنجار۽ چانڊيو قبيلي جي سردار برهان خان چانڊيو، سردار احمد کان پرزور اپيل ڪئي ته نينگري کي جلدي بازياب ڪرائي کين انصاف ڏياريو وڃي۔