اياز لطيف پليجو سنڌي ايسوسيئيشن آف نارٿ آمريڪا (سانا) جي 41ھين ڪنوينشن ۾ شرڪت لاءِ آمريڪا جي شھر ھيوسٽن پھچي ويو

حيدرآباد /ھيوسٽن: قومي عوامي تحريڪ جو سربراھ اياز لطيف پليجو سنڌي ايسوسيئيشن آف نارٿ آمريڪا (سانا) جي 41ھين ڪنوينشن ۾ شرڪت لاءِ آمريڪا جي شھر ھيوسٽن پھچي ويو. سانا جي جنرل سيڪريٽري اسد شيخ ۽ ٻين سندس زبردست آجيان ڪئي. اياز لطيف پليجو سانا ڪنوينشن.۾ مھمان خاص طور نئين سنڌ، شاھ لطيف ۽ قومي وسيلن بابت ٽن اھم سيشنز کي خطاب ڪندو. ٻئي طرف اياز لطيف پليجي پنجاب ۾ ٻوڏ جي تباهڪارين تي افسوس جو اظھار ڪندي ان جو حڪومت کي ذميوار قرار ڏنو آھي. اياز لطيف پليجي چيو آھي تہ, پنجاب ۾ ٻوڏ جي ذميوار حڪومت آھي. راوي درياھ ۾ غير قانوني ھائوسنگ اسڪيمون ٺاھي لکين ماڻھن جي جان ۽ مال کي داء تي لڳايو ويو. پنجاب 3 درياھ راوي، ستلج ۽ بياس سنڌ کان پڇڻ کانسواءِ ھندستان کي وڪرو ڪري ڇڏيا. 1988 کانپوء درياھن ۾ پاڻي آيو آھي تہ درياھ اندر ويٺل ماڻھو متاثر ٿيا آھن. درياھ اندر ھائوسنگ اسڪيمون ٺاھڻ جي اجازت ڏيندڙ وزيرن، ڪامورن ۽ بلڊرز کي گرفتار ڪري انھن کان نقصان جو ازالو ڪرايو وڃي. اياز لطيف پليجي چيو تہ وفاقي ۽ پنجاب حڪومت پنھنجن گناھن کي لڪائڻ لاءِ عوام کي گمراھ ڪري رھيا آھن تہ ڪالاباغ ڊيم ٺھيل ھجي ھا ته تباھ ڪاريون نه ٿين ھا. سمنڊ ۾ پاڻي ضايع ٿي رھيو آھي. دنيا ۾ ڪٿي بہ ڊيم ٻوڏ کي روڪيندا ناھن، ڊيم ٻوڏ جو وڏو سبب بنجن ٿا. ھندستان ڊيم ٺاھيا، اھي جڏھن ڀرجي ويا تہ انھن کي کوليو ويو، جيڪو پاڻي پنجاب ۾ داخل ٿيو آھي. ڪالاباغ وارو علائقو راوي درياھ کان 400 ڪلوميٽر کان بہ پري آھن، اھو ممڪن ئي ناھي تہ جيڪڏھن ڪالاباغ ڊيم ٺھيل ھجي ھا تہ ھندستان جي ڊيمن جو ڇڏيل پاڻي اتي وڃي گڏ ٿئي ھا. وفاقي حڪومت ۽ پنجاب حڪومت عوام سان دوکو نہ ڪري. ڊيم تباھين جو سبب آھن. سنڌو درياھ تي ڪو بہ ڊيم يا ڪئنال قبول نہ ڪيو ويندو. اياز لطيف پليجي چيو تہ راوي، ستلج، بياس سنڌو درياھ جون مددي نديون آھن. سمورن درياھن، ندين ۽ پاڻي جي قدرتي گذر گاھن تان قبضا ۽ رڪاوٽون ختم ڪيون وڃن. اياز لطيف پليجي چيو تہ سنڌ ۾ بندن کي مضبوط ڪرڻ جي نالي تي اربين روپيا جاري ڪرڻ بدران درياھ ۾ بااثر ماڻهن جا زمينداري بند ختم ڪرائي پاڻي کي اڳيان رستو ڏياري سنڌ کي وڏي نقصان کان بچايو وڃي. سنڌ حڪومت درياھ ۾ پاڻي جي چاڙھ کي ڪمائي جو ذريعو نہ بنائي.