ملير ۾ لطيف جي پارکو پروفيسر خاصخيلي محمد رحيم راولاڻي جي ڏهين ورسي تقريب

ڪراچي سيريز جي سنڌي سکيا مرڪز ۾ رحيم راولاڻي ادبي اڪيڊمي ۽ مهراڻ لائبريري ملير طرفن تقريب منعقد

ملير (رپورٽ: عبدالرشيد مورجھريو) ملير جي نامور تعليم دان، ليکڪ، شاعر ۽ شاهه لطيف جي فڪر جي پارکو پروفيسر خاصخيلي محمد رحيم راولاڻي جي ڏهين ورسي جي مناسبت سان تقريب ڪراچي سيريز جي سنڌي سکيا مرڪز ۾ رحيم راولاڻي ادبي اڪيڊمي ۽ مهراڻ لائبريري ملير طرفان منعقد ڪئي وئي، جنهن ۾ سياسي، سماجي اڳواڻن سان گڏ نامور اديبن، شاعرن، شاگردن ۽ سول سوسائٽي جي نمائندن وڏي تعداد ۾ شرڪت ڪئي تقريب جي صدارت ادبي شخصيت پروفيسر مشتاق مهر،ڪئي جڏهن ته مختلف ساٿين ۽ شاگردن پروفيسر اعجاز قريشي، رياض شاهد دايو، پروفيسر سندرداس، منٺار خاصخيلي، شفيع مرگهر،غلام نبي مگسي لطيف راولاڻي ۽ ٻين مرحوم پروفيسر جي علمي، ادبي ۽ تعليمي خدمتن تي خراج تحسين پيش ڪيو. مقررن پنهنجي خطاب ۾ چيو ته پروفيسر محمد رحيم راولاڻي پنهنجي زندگي تعليم ۽ ادب کي واڳيل رهيو، خاص طور تي شاهه لطيف جي شاعري ۽ فڪر کي نئين نسل تائين پهچائڻ لاءِ سندس ڪوششون هميشه ياد رکبيون مقررن وڌيڪ چيو ته راولاڻي نه صرف ليکڪ ۽ شاهه لطيف جو محقق هو، پر هڪ بهترين استاد ۽ راهه ڏيکاريندڙ شخصيت به هو، جنهن پنهنجي شاگردن ۾ علمي شعور سان گڏ قومي سڃاڻپ جو احساس به پيدا ڪيو.تقريب ۾ سندس زندگي ۽ خدمتن تي مقالا پڙهيا ويا ۽ لطيفيات تي سندس تحقيق کي سنڌ جي فڪر ۽ ادب لاءِ امر خزانو قرار ڏيندي سنڌي ادب جي واڌاري لاءِ ڪيل ڪوششن کي ياد رکڻ جو عزم ورجايو ويو.