نوشهروفيروز ويجهو مرحوم فدا حسين غلام حسين جي ايصال ثواب لاء مفت ميڊيڪل ڪئمپ قائم

ڳوٺ حسين آباد ۾ ٽيم سيد ثمر نقوي طرفان ڪيمپ لڳائي وئي، ڊاڪٽر شاهد حسين مُوريو مريضن جو علاج ڪيو

نوشهرو فيروز (ڊر) ٽيم سيد ثمر نقوي جي طرفان مرحوم فدا حسين غلام حسين جي ايصال ثواب لاء ڇھين مفت ميڊيڪل ڪئمپ ڳوٺ حسين آباد ۾ لڳائي ويئي جنهن ۾ ڊاڪٽر شاهد حسين مُوريو مختلف بيمارين ۾ مبتلا سوين مريضن جو مفت چيڪ اپ ڪري کين دوائون ڏنيون۔ ان موقعي تي ڪئمپ جي سرواڻ سيد ثمر نقوي ميڊيا سان ڳالهائيندي چيو ته اسانجي ڪوشش آهي اهڙن علائقن ۾ ڪئمپون لڳايون جتي ڪابه ويجهي اسپتال نه هجي۔ هن علائقي ۾ ڪوبه صحت مرڪز ناهي جنهنڪري هتان جا غريب مسڪين ۽ مزدور طبقي جا ماڻهو بيماريء جي صورت ۾ ڏاڍي ڏکي صورتحال مان گذرن ٿا۔ انهن جي تڪليف کي محسوس ڪندي اسان مفت ميڊيڪل ڪئمپ لڳرائي آهي جنهن ۾ پنهنجي وس آهر مسڪين ماروئڙن جو مفت چيڪ اپ ڪري کين مفت دوائون ڏيئي رهيا آهيون۔ هن ڪئمپ ۾ موسم جي تبديليء سبب ڪيتريون ئي بيماريون ڦهلجي رهيون آهن جن ۾ مليريا، ڊائريا ۽ چمڙيء جون بيماريون عام آهن جڏهن ته پاڻيء جو جر خراب هجڻ ڪري پيٽ جون بيماريون پڻ ٿي ويون آهن ان سلسلي ۾ اڳواٽ اسان هن علائقي ۾ فلٽر پلانٽ به لڳرايو آهي جنهن مان علائقي واسي فائدو وٺي رهيا آهن۔ هن مخير حضرات سميت سرڪار کي اپيل ڪئي ته عوام جي ڀلائيء لاء اڳتي اچي تعليم ۽ صحت جي شعبي کي بهتر بڻائڻ ۾ پنهنجو ڪردار ڪن۔