نوشهروفيروز ۾ محمد اسماعيل شاهه بخاري جو عرس ملهايو ويو

نوشهرو فيروز (ڊ ر)نوشهروفيروز ۾ سيد محمد اسماعيل شاهه بخاري جو ساليانو عرس عقيدت سان ملهائيو ويو، خبر موجب نوشهرو فيروز جي معروف روحاني پيشوا سيد محمد اسماعيل شاهه بخاري رحمه الله جو ساليانو عرس هن سال به وڏي عقيدت، احترام ۽ مذهبي جوش سان ملهائيو ويو۔ عرس جون تقريبون نمازِ مغرب کان پوءِ شروع ٿيون۔ کوکر محلا, خانزاده محلا ۽ ڀرپاسي وارن علائقن مان عقيدتمندن طرفان چادرن جا جلوس وڏي شان ۽ ڌام ڌوم سان خانزاده محلي پهتا، جتان مرحوم حاجي محمد حنيف خانزاده ۽ عامر رئيس خانزاده جي گهرن مان تاج ۽ چادر کڻي جلوس مزار مبارڪ ڏانهن روانو ٿيو ۽ چادرپوچي ۽ گلن جا هار پيش ڪيا ويا۔ نمازِ عشاء کان پوءِ مزار تي محفلِ ميلادالنبي ﷺ منعقد ڪئي ويئي، جنهن ۾ ضلعي جا نامور نعت خوانن ۽ ذڪر خوانن نعتون ۽ منقبت پيش ڪيون۔ درود وسلام ۽ خصوصي دعا کان پوءِ لنگر جو انتظام پڻ ڪيو ويو۔ عرس ۾ مريدن سان گڏ عام شهرين جي به وڏي انگ ۾ شرڪت رهي۔ عرس جي انتظامن جون ذميواريون استاد نذير خانزاده ۽ برادران سرانجام ڏنيون، جڏهن⁠تہ انجمن غلامانِ قلندر يونٽ سائين اسماعيل شاهه نوشهرو فيروز ۽ انجمن غلامانِ مصطفی ﷺ ميلاد ڪميٽي نوشهرو فيروز جا ڪارڪن به سرگرم رهيا۔