ملير: محمد علي پٺاڻ جي نئين ڪتاب "عجب جھڙا انسان" (خاڪا) جو مهورت

محمد علي پٺاڻ جي ڏوھٽي مُعِزُ پٺاڻ ۽ ڏوھِٽي حورين پٺاڻ (جونيئر شھر بانو پٺاڻ) ھٿان مھورت

ملير (رپورٽ: عبدالرشيد مورجھريو) سنڌ جي سينيئر ڪھاڻيڪار، شاعر، ڊراما نگار ۽ ڪالم نگار محمد علي پٺاڻ جي نئين ڇپيل چاليھين ڪتاب "عجب جھڙا انسان" (خاڪا) جو سندس ڏوھٽو مُعِزُ پٺاڻ ۽ ڏوھِٽي حورين پٺاڻ (جونيئر شھر بانو پٺاڻ) جي ھٿان مھورت ڪئي وئي. ڪتاب جو مھاڳ ڊاڪٽر شير مھراڻي ۽ پيش لفظ آفتاب سُرھيي لکيو آهي. ان کان سواءِ مختصر راءِ ڊاڪٽر جاويد عباسي جي ۽ انگريزيءَ ۾ ڄام جماليءَ مفصل مضمون لکيو آهي. جڏهن ته بيڪ ٽائيٽل لاءِ سِٽون امر پيرزادي جون تحرير ٿيل آهن. ڪتاب جي ارپنا ليکڪ سنڌ جي موجوده دور جي ليجنڊ ڪھاڻيڪارا ۽ ناول نگار جھان آرا سومرو کي ڪئي وئي آهي. مرڪ پبليڪيشن ڪراچي، پاران ڇپيل ھن ڪتاب ۾ ليکڪ پنھنجي امڙ عائشه خاتون عباسي، سوڀي گيانچنداڻيءَ، شيخ اياز، تاج بلوچ، انور بلوچ، جوھر بروهيءَ، بادل جماليءَ، بدر ابڙي، شھيد ملير مرتضيٰ بلوچ، زرار پيرزادي، عيد سولنگياڻيءَ، مامي رمضان ساريي، لياقت راڄپر، منظور قادر، استاد محمد بچل عباسي، خان محمد چانڊيي، حافظ نظير عباسي، ڊاڪٽر جاويد شيخ ۽ علي ڏني چني بابت لکيل خاڪا شامل ڪيل آهن. ڪتاب جو ملهه چار سئو رپيا آهي. جيڪو سنڌ جي سمورن بڪ اسٽالن تي دستياب آهي.