عمرڪوٽ ۾ شهيد مير مرتضىٰ ڀٽو جي قاتلن جي گرفتاري لاءِ احتجاجي ڪيمپ قائم

شهيد مير مرتضىٰ ڀٽو هڪ بهادر ۽ انقلابي اڳواڻ هو، جنهن کي هڪ رٿابندي تحت ناحق قتل ڪيو ويو: اڳواڻ

عمرڪوٽ (رپورٽ:ڪانجي مل رکيسر) ذوالفقار علي ڀٽو جونيئر آرگنائيزيشن مينارٽي ونگ ضلع عمرڪوٽ ۽ پيپلزپارٽي شهيد ڀٽو گروپ جي سڏ تي پريس ڪلب آڏو شهيد قائد انقلاب مير مرتضىٰ ڀٽو ۽ سندس ساٿين جي قاتلن جي گرفتاري لاءِ احتجاجي ڪيمپ قائم ڪري علامتي بک هڙتال ڪئي وئي، جنهن ۾ وڏي انگ ۾ ڪارڪنن شرڪت ڪئي، احتجاجي ڪيمپ ۾ مينارٽي ونگ سنڌ جو صدر ڪامريڊ ڀاڳو مل ميگهواڙ، ضلع صدر وڪيل دليپ ڪمار ڀيل، جنرل سيڪريٽري هاشم ڀيل، گلزار علي راڄڙ، علي نواز بجير، مبشر بنگلاڻي، امجد ڪوري، موهن لال، انيل ڪمار، ساگر، آنند ڪمار، ايڊووڪيٽ اعجاز علي، ايڊووڪيٽ سنجيت ڪمار، شاگرد سريش ڪمار پڏماڻي، شاگرد سنجي ڪمار، لاکو ڀيل، ايس ٽي پي اڳواڻ ڪامريڊ ميهار علي بنگلاڻي، ڊاڪٽر رميش ڪمار ڀيل، جسقم اڳواڻ ارون ميگهواڙ، نعمت الله زرداري ۽ ٻين سياسي سماجي اڳواڻن شرڪت ڪئي، اڳواڻن خطاب ڪندي چيو ته شهيد مير مرتضىٰ ڀٽو هڪ بهادر ۽ انقلابي اڳواڻ هو، جنهن کي هڪ رٿابندي تحت ناحق قتل ڪيو ويو، پر 29 سال گذرڻ باوجود قاتلن ۽ اصل ڪردارن کي سزا نه ملي سگهي آهي، رياست قاتلن کي پڪڙڻ ۾ مڪمل ناڪام وئي آهي، جنهن مان صاف ظاهر آهي ته قاتل رياست جي ئي ڇٽي ۾ آهن، انهن چيو ته سامراجي قوتن جي ونگار وھندي ڀٽو خاندان کي نشانو بڻايو ويو، جيڪا ملڪ سان سڌي غداري آهي ۽ ان جي سزا اڄ به سموري عوام ڀوڳي رهي آهي، ڪارڪنن نعريبازي ڪندي مطالبو ڪيو ته مير مرتضىٰ ڀٽو ۽ سندس ساٿين جي قتل ۾ ملوث سڀني ڪردارن کي بنا دير گرفتار ڪري سخت سزا ڏني وڃي، احتجاجي ڪيمپ جي پڄاڻي تي شهيد مير مرتضىٰ ڀٽو جي 71هين جنم ڏهاڙي جو ڪيڪ پڻ ڪٽي علامتي بک هڙتال ختم ڪئي وئي.