پارٽي قيادت جنهن اعتماد جو اظهار ڪيو آهي ان تي پورو لهندي عوامي خدمت کي جاري رکندس: نذير احمد ڀٽو

ملير ۾ پ پ پي ايس 86 جي صدر نذير احمد ڀٽو جي شاندار آجيان

ملير (عبدالرشيد مورجھريو)پاڪستان پيپلز پارٽي پي ايس 86 ملير جي صدر نذير احمد ڀٽو جي آجيان ۾ پارٽي ڪارڪنن شاندار ريلي ڪڍي، جيڪا رزاق آباد، لاشاري ڳوٺ، عبدالله ڳوٺ ۽ ڀينس ڪالوني ۽ ٻين علائقن مان ٿيندي شاھ لطيف ٽائون پهتي، جتي وڏي عوامي جلسي ۾ تبديل ٿي وئي ريلي جي اڳواڻي سينيئر پارٽي اڳواڻن هاشم لاشاري، غني گبول، ستار حمايتي جميل لاشاري ۽ ٻين ڪئي شرڪت ڪندڙن ملير جو ڀٽو نذير ڀٽو جا نعرا هڻي ماحول گرمايو جلسي کي خطاب ڪندي نذير احمد ڀٽو چيئرمين بلاول ڀٽو زرداري، فريال ٽالپور، نثار کهڙو ۽ ٻين مرڪزي ۽ ضلعي اڳواڻن جو شڪريو ادا ڪيو ۽ چيو ته هي عهدو منهنجي لاءِ صرف منصب نه پر عوامي خدمت جو موقعو آهي. هن چيو ته هو پارٽي نظريي ۽ عوامي مسئلن جي حل لاءِ ڏينهن رات محنت ڪندو رڪاوٽڻ باوجود مان سڀني کي گڏ کڻي هلڻ تي يقين رکان ٿو، ۽ چاهيان ٿو ته پارٽي اڳواڻ ۽ ڪارڪن تنظيم جي اتحاد هيٺ گڏجي ڪم ڪن هن پي ايس جي سمورين برادرين جو شڪريو ادا ڪيو ۽ چيو ته اسين سڀ پيپلز پارٽي جا آھيون چيئرمين بلاول ڀٽو جي اڳواڻي ۽ پارٽي جهنڊي هيٺان عوامي خدمت جاري رکنداسين ٻئي پاسي نذير ڀٽو جي مقرري بعد پي ايس 86 جي تنظيم ۾ اختلاف شدت اختيار ڪري ويا آهن، جتي نئین چونڊيل جنرل سيڪريٽري رسول خان سواتي، سينيئر نائب صدر انور بلوچ، انفارميشن سيڪريٽري نئين صدر سان گڏ ڪم ڪرڻ کان انڪار ڪري ڇڏيو آھي ٻئي پاسي يوسي ڪيٽل ڪالوني جي چيئرمين جاويد ڪاڪو، يوسي چوڪنڊي جي چيئرمين رشيد احمد پنهور، وائس چيئرمين منظور عارفاني ۽ ابراهيم حيدري جي پارلياماني ليڊر اختر عارفاني سميت ڪيترن ئي اڳواڻن احتجاجن استعيفائون ڏنيون آهن جڏهن ته پي ايس 86 جي چئين يوسين چوڪنڊي ڀينس ڪالوني، شاھ لطيف، صالح محمد ڳوٺ جي عهديدارن پڻ نئين صدر سان گڏ هلڻ کان انڪار ڪري ڇڏيو آھي انهن اڳواڻن جو موقف آهي ته نذير ڀٽو پي ايس 86 جو رهواسي ناهي ضلع تنظيم جي پروپوزل ۾ سندس نالو شامل هو سندن چوڻ هو ته ضلعي تنظيم جي مشاورت کانسواءِ سندس چونڊ ڪئي وئي آھي جيڪا پارٽي جي جمهوري اصولن ۽ ڪارڪنن جي اعتماد کي نقصان پهچائي ٿي جڏهن ته ڄاڻايل فيصلي تي ضلعي صدر راجا رزاق بلوچ به نا خوش آهي ٻئي پاسي ٻنهي ڌرين وچ ۾ سوشل ميڊيا تي ڪرپشن ۽ ٻين الزامن جي ڏي وٺ پڻ جاري آهي، جنهن سان تنظيم اندروني اختلافن جو شڪار ٿي وئي آهي