نوشهروفيروز ۾ پسند جي پرڻي جي تڪرار تان حملي ۾ هڪ ڄڻو قتل، 2 زخمي

نوشھرو فيروز( ڊ ر) نوشھرو فيروز ڀرسان ڳوٺ پليو مستوئي ۾ پيار جي پرڻي واري معاملي تان مستوئي ۽ سيال برادري وچ ۾ جهيڙو ٿي پيو، جنهن ۾ هٿيارن جو استعمال ڪيو ويو. فائرنگ جي نتيجي ۾ مستوئي برادري جو صفدر مستوئي موقعي تي ئي قتل ٿي ويو، جڏهن ته زاھد مستوئي ۽ محمد علي مستوئي سخت زخمي ٿي پيا جن کي بروقت سول اسپتال نوشھرو فيروز ۾ داخل ڪيو ويو آهي جتي سندن حالت ڳڻتي جوڳي ٻڌائي پئي وڃي ياد رهي ته ڪجهه وقت اڳ سيال برادري جي ڇوڪري نوالنساه سيال پنهنجي مرضيءَ سان مستوئي برادريءَ جي نوجوان خان محمد مستوئي سان پيار جو پرڻو ڪيو هو جيڪو ٻنهي ڌرين وچ ۾ تڪرار جو سبب بڻيو ۽ اڄ ان تڪرار جي ڪري ٻنھي ڌرين وچ ۾ خوفناڪ جهيڙو ٿي پيو علائقي واسين جو چوڻ آهي ته پوليس واقعي واري هنڌ تي پهتل ضرور آهي پر عملي طور تي خاموش تماشائي بڻيل آهي ۽ ٻنهي ڌرين ۾ وقفي وقفي سان فائرنگ جو سلسلو اڃا تائين جاري آهي جنهن سبب علائقي ۾ وڏي خونريزي جو خدشو وڌي ويو آهي ان واقعي کان پوءِ مستوئي برادري جي ماڻهن وڏي انگ ۾ نيشنل پريس ڪلب نوشھرو فيروز اڳيان احتجاجي مظاهرو ڪندي انتظاميه کان قاتلن جي گرفتاري ۽ تحفظ فراهم ڪرڻ جو مطالبو ڪيو مظاهرين الزام هنيو ته پوليس بروقت قدم کڻڻ بدران خاموش رهي ۽ واقعي کي روڪڻ لاءِ ڪا به ڪوشش نه ڪئي علائقي ۾ ڇڪتاڻ جو ماحول برقرار آهي ۽ صورتحال کي ڪنٽرول ڪرڻ لاءِ وڌيڪ نفري مقرر ڪرڻ جو مطالبو ڪيو ويو