مورو ۾ پلاننگ اينڊ ڊولپمينٽ، اربن ريجنل پاليسي ۽ اسٽريٽجڪ پلاننگ کاتي پاران سيمينار

ڊپٽي ڊائريڪٽر اربن ريجنل پاليسي ذوالفقار علي ڪنڀر، اسسٽنٽ ڊائريڪٽر علي مراد ابڙو، ڪنسلٽنٽ سيد بابر شاهه آگاهي ڏني

نوشهروفيروز (ڊ ر) سنڌ حڪومت جي پلاننگ اينڊ ڊولپمينٽ، اربن ريجنل پاليسي ۽ اسٽريٽجڪ پلاننگ کاتي پاران مورو شهر جي ماسٽر پلان جي تياري جي حوالي سان هڪ سيمينار منعقد ڪيو ويو. ڊپٽي ڊائريڪٽر اربن ريجنل پاليسي ذوالفقار علي ڪنڀر، اسسٽنٽ ڊائريڪٽر علي مراد ابڙو، ڪنسلٽنٽ سيد بابر شاهه سيمينار جي شرڪت ڪندڙن کي پروگرام بابت آگاهي ڏني. مورو شهر جي ماسٽر پلان جي ڪنسلٽنٽ (اي اي ڪنسلٽنگ) چيو ته سنڌ جي وڏن شهرن لاءِ ماسٽر پلان تيار ڪيا پيا وڃن. هي پروگرام 2013 ۾ شروع ڪيو ويو هو، جنهن ۾ سنڌ جي 17 وڏن شهرن لاءِ ماسٽر پلان تيار ڪيا ويا آهن. جڏهن ته 14 شهرن جي ماسٽر پلان تي ڪم جاري آهي. هن چيو ته ٽئين مرحلي ۾ ڪوٽڙي، هالا، ٽنڊو آدم ۽ مورو شامل آهن. هن سيمينار جي انعقاد جو مقصد ماسٽر پلان ۾ شامل اسٽيڪ هولڊرز سان صلاح مشورو ڪرڻ آهي. هن چيو ته شهر جو ڊيٽا گڏ ڪرڻ کان پوءِ هڪ رپورٽ تيار ڪئي وئي آهي جيڪا سڀني شرڪت ڪندڙن جي سامهون رکي پئي وڃي. ماسٽر پلان ۾ ايندڙ 20 سالن تائين آبادي کي درپيش گهربل صحت، تعليم، صاف پاڻي جي فراهمي، نيڪال، پارڪ، روڊ ۽ ٻين مسئلن کي نظر ۾ رکيو ويو آهي. هن چيو ته شهرن ۾ تيزي سان وڌندڙ آبادي کي نظر ۾ رکندي اڳواٽ انتظام ڪرڻ جي ضرورت آهي. هن سڀني ميمبرن کي اپيل ڪئي ته ماسٽر پلان کي بهتر بڻائڻ لاءِ پنهنجون تجويزون شامل ڪن. هن چيو ته جيئن شهرن جي آبادي وڌي رهي آهي، جيڪڏهن ان لاءِ مناسب انتظام نه ڪيا ويا ته سخت مشڪلاتن کي منهن ڏيڻو پئجي سگهجي ٿو. سيمينار ۾ اسسٽنٽ ڪمشنر مورو محمد مستقيم قريشي، چيئرمين ميونسپل ڪميٽي نذير احمد ميمڻ، سيد ڪاظم شاهه، ڊپٽي ڊائريڪٽر لائيو اسٽاڪ ڊاڪٽر اڪرم رائو، اسسٽنٽ انجنيئر ورڪس اينڊ سروسز جاويد علي ڀنگر، انفارميشن آفيسر قمرالزمان ڀنڀرو ۽ ٻيا آفيسر موجود هئا.