عمرڪوٽ ۾ 5 منشيات فروش گرفتار، آئيس، چرس ۽ سفينا هٿ

عمرڪوٽ (رپورٽ:ڪانجي مل رکيسر) عمرڪوٽ سي آءِ اي پوليس، سٽي پوليس ۽ ڍورونارو پوليس جي گڏيل ٽن ڌار ڌار ڪارواين دوران منشيات وڪرو ڪندڙ پنج منشيات فروش گرفتار، جڏهن ته هڪ جوابدار فرار ٿي ويو، گرفتار جوابدارن وٽان لکين روپين جي ماليت جي نشي آور شين آئيس، چرس ۽ سفينا هٿ ڪري منشيات ايڪٽ تحت ڪيس داخل ڪيو ويو آهي، ڊي ايس پي سٽي تصور جٽ، سي آءِ اي انچارج خليل ڪنڀر ۽ ايس ايڇ او سٽي سيد الطاف شاهه گڏيل پريس ڪانفرنس ڪندي ٻڌايو ته ڳجهي اطلاع تي ٽيمن ڪاروايون ڪيون، جن ۾ دانش قائمخاني، بلال خاصخيلي، ايوب خاصخيلي، علي مرتضيٰ حجام ۽ نريش ڀيل کي گرفتار ڪيو ويو، جڏهن ته هڪ جوابدار قربان کوسو فرار ٿيڻ ۾ ڪامياب ٿي ويو، پوليس موجب گرفتار ٿيل جوابدارن وٽان مجموعي طور تي 80 گرام آئيس، هڪ ڪلو چرس ۽ 50 پيڪٽ سفينا هٿ ڪيا ويا، جن جي ماليت لڳ ڀڳ 2 لک رپيا آهي، گرفتار جوابدار ماضي ۾ به منشيات جي ڪيسن ۾ چالان ٿي چڪا آهن ۽ شهر جي مختلف علائقن ۾ نشي جي غيرقانوني وڪري ۾ ملوث رهيا آهن ذريعن موجب پوليس وڌيڪ جاچ جاري رکندي، فرار ٿيل جوابدار قربان کوسو جي گرفتاري لاءِ ڇاپا هنيا پيا وڃن، پوليس شهري عوام کان اپيل ڪئي آهي ته آئيس، چرس ۽ ٻين خطرناڪ نشن جي وڪري ۾ ملوث ماڻهن جي نشاندهي ڪري پوليس سان سهڪار ڪن، ته جيئن معاشري کي هن ناسور کان پاڪ ڪري سگھجي.