ڪينجهر ڍنڍ تي ويندڙ جماعت اسلامي جي ڪارڪنن جي بس سان حادثو، +6 ڄڻا فوت، 26 کان وڌيڪ زخمي

ٺٽو( شفيق ڀٽي) مڪلي ويجھو ڪراچي کان ڪينجھر ڍنڍ تي پڪنڪ ملھائڻ لاء ويندڙ جماعت اسلامي جي ڪارڪنن جي بس تيز رفتاري سبب ڪلٽي ٿي کاھي ۾ ڪري پئي، 6 ڄڻا موقعي تي فوت، 26 کان وڌيڪ، فوتين جا لاش ۽ زخمين کي سول اسپتال مڪلي منتقل ڪيو ويو. تفصيل موجب مڪلي لڳ درگاھ محمد علي پير وٽ ٺٽو ڪراچي قومي شاهراھ تي ڪراچي اورنگي ٽائون کان ٺٽي ڪينجھر ڍنڍ تي پڪنڪ ملھائڻ لاء ايندڙ جماعت اسلامي جي ڪارڪنن جي بس تيز رفتاري سبب ڪلٽي ٿي پاڻي واري کاھي ۾ ڪري پئي، جنھن جي نتيجي ۾ بس جي ڇت تي سوار 6 ڄڻا ڪري موقعي تي فوت ٿي ويا، جڏھن تہ 26 کان مٿي زخمي ٿي پيا، فوتين جا لاش ۽ زخمين کي سول اسپتال مڪلي منتقل ڪيو ويو، فوتين ۾ اسداللہ، ارباب، محمد رئوف، بشير، احسان اللہ ۽ ابرار علي شامل آھن، جڏھن تہ زخمين ۾ اورنگزيب، انور علي، گوھر علي، ارشد علي، ڪامران الحق، اذان، حماد ربي، عماد ربي، عطائي ربي، محمد آصف، نعمان، ظھور احمد، فضل ڪريم، محمد ساجد، جاويد اقبال، خالد اقبال، فيضان، حسنين ۽ ٻيا شامل آھن، ياد رھي تہ ڪراچي واسي ڪينجهر ڍنڍ گهمڻ لاء ايندي حادثي جو شڪار ٿيا آھن، جڏھن تہ صبح کان وٺي تيز طوفاني برسات جو پڻ مڪلي، ٺٽو، درگاھ ستيون، جھمپير، جنگشاھي سميت اسپاس جي علائقن ۾ وسڪارو وقفي وقفي سان جاري رھيو، برسات سبب زخمين توڙي فوتين کي اسپتال پھچائڻ ۾ پڻ ڪافي مشڪلاتون پيش ايون، اطلاع ملڻ تي اي سي ٺٽو، پوليس عملدارن سان گڏ جماعت اسلامي جا اڳواڻ عبدالله آدم گندرو، محمد علي سنڌي ۽ ٻيا پڻ حادثي واري ھنڌ پھچي ويا، جن فوتين جي لاش توڙي زخمين کي ريسڪيو ڪرائي 1122 ۽ ايدھي ايمبولينس ذريعي سول اسپتال مڪلي پھچايو ويو، سمورا زخمي ۽ فوتي جماعت اسلامي جا ڪارڪن ٻڌايا پيا وڃن، جيڪي ڪينجھر ڍنڍ تي تفريح ملھائڻ لاء بس ۾ ايندي بس مڪلي ويجھو کاھي ۾ ڪرڻ ڪري حادثي جو شڪار بڻيا، جڏھن تہ بس کي وڏي ڪرين گھرائي بس کي سڌو ڪري کاھي مان ٻاھر ڪڍيو ويو، حادثي سبب بس کي پڻ ڪافي نقصان پھتو آھي، جڏھن تہ فوتين جا لاش انتظاميہ ضروري ڪاروائي بعد وارثن حوالي ڪري ڇڏيا، جيڪي لاش ڪراچي کڻائي ويا۔