حيدرآباد جي لطيف آباد 10 واسين جي قومي عوامي تحريڪ ۾ شموليت جو اعلان

سنڌ ۾ مهانگائي جو طوفان برپا آهي.ھاري، مزدور ۽ غريب ماڻھو خودڪشيون ڪرڻ تي مجبور آھن: الطاف خاصخيلي

حيدرآباد (بيورو) قومي عوامي تحريڪ جي مرڪزي سينئر ڊپٽي جنرل سيڪريٽري الطاف خاصخيلي سان حيدرآباد جي علائقي لطيف آباد 10 جي رھواسين سيد شڪيل احمد ڪامراني، پرويز علي،انور چوڌري، غلام عباس باجوه،منا عباسي، نديم شيخ، عابد ملڪ، احسن علي، اسلم شاھ، قدير احمد، محمد طفيل، ايس شيخ ۽ ٻين ملاقات ڪري قومي عوامي تحريڪ جي سربراھ اياز لطيف پليجو جي قيادت تي اعتماد جو اظهار ڪندي قومي عوامي تحريڪ ۾ شامل ٿيڻ جو اعلان ڪيو. ان موقعي تي قومي عوامي تحريڪ جي مرڪزي سينئر ڊپٽي جنرل الطاف خاصخيلي خطاب ڪندي چيو تہ پيپلز پارٽي حڪومت سنڌ ۾ مهانگائي جو طوفان برپا ڪري ڇڏيو آهي.ھاري، مزدور ۽ غريب ماڻھو خودڪشيون ڪرڻ تي مجبور آھن. حڪمران ھوش کان ڪم وٺن، انھن کي واپس عوام ۾ اچڻو آھي. سنڌ بدامنيءَ جي باھ ۾ سڙي رھي آھي شھرن ۽ ڳوٺن جا روڊ رستا ڏوھارين جي حوالي ٿيل آھن. پوليس ڏوھارين اڳيان بيوس لڳي پئي آھي. الطاف خاصخيلي چيو تہ پ پ پ جي سنڌ سرڪار اقتدار جي حوس خاطر سنڌ دشمن فيصلا ڪري رھي آھي، پ پ پ جي سنڌ دشمن فيصلن جي ڪري سنڌ گھڻ رخي مسئلن ۾ جڪڙيل آھي. سنڌ ۾ نااھل حڪمراني سالن کان ڪوڙ، ٺڳي ۽ بدنيتي جي بنيادن تي موجود آھي. ھڪ طرف مھانگائي جو طوفان برپا ڪري غريب ماڻھن کان جيئڻ جو حق کسيو پيو وڃي تہ ٻئي طرف بدامني ۾ واڌ سبب سنڌ ۾ غنڊہ راڄ قائم ٿيل آھي ۽ سڄي سنڌ منشيات جو ڳڙھ بڻجي وئي آھي، سرڪار جي رٽ نظر نٿي اچي. سنڌ جي عوام کي ڏوھارين، ڀوتارن، لٺ سردارن جي رحم و ڪرم تي ڇڏيو ويو آھي، چوريون، ڦريون، قتل غارت جا واقعا عروج تي آھن ٽئين پاسي منشيات جو عام واھپو ۽ وڪرو سرعام ھلندڙ آھي نتيجي ۾ لکين ماڻھون نشي جا عادي بنجي پنھنجون زندگيون داءُ تي لڳائي ڇڏيون آھن. سنڌ جي ننڍن وڏن شھرن ۾ پوليس جي سرپرستي ۾ منشيات جو ڪڌو ڪاروبار ھلندڙ آھي. سنڌ ۾ سڀ کان وڌيڪ منافعي بخش ڪاروبار گٽڪو، مائو ۽ مين پڙي، چرس، ٺرو، آئيس، ھيروئن ۽ ٻي منشيات آھي. ھر ضلعي مان پوليس ماھوار ڪروڙين روپيا ڀتو وصول ڪري ٿي.الطاف خاصخيلي چيو تہ پوليس عوام جي جان مال جو تحفظ ڪرڻ بدران ڏوھارين جي سرپرستي ڪري رھي آھي. قومي عوامي تحريڪ سنڌ جي ماڻھن جي حقن لاء جاکوڙي رھي آھي شھرين کي قانوني، آئيني ۽ انساني حق ڏيارڻ لاءِ جدوجھد ڪري رھي آھي. قومي عوامي تحريڪ ضلعي حيدرآباد جي صدر نظير بليدي خطاب ڪندي چيو تہ وزير ۽ ڪامورا عوام جي ٽئڪس سان ھلن ٿا، اھي پاڻ کي بادشاھ سمجھڻ ڇڏي ڏين۔ سڀ کان وڌيڪ طاقتور ڪرسي ناھي۔ عوام کي وڏي طاقت آھي۔ عوام کي لتاڙڻ ۽ نظرانداز ڪرڻ بند ڪيو وڃي۔ نظير بليدي چيو تہ بلدياتي ادارن عوام جي دولت تي ڌاڙا ھنيا آھن، بلدياتي ادارن کي جيڪي پئسا مليا اھي ڪرپشن جي نظر ٿي ويا. ڪرپشن ۾ ملوث چيئرمينن ۽ آفيسرن جا ڪميشن عيوض رڪارڊ سڌا ڪيا ويا آھن. ھيٺين سطح تائين انصاف ۽ ترقياتي ڪم ڪرائڻ وارو خواب خواب ئي رھجي ويو. جيڪڏھن چيڪ اينڊ بيلنس ھجي ھا تہ اربين روپيا ڪرپشن جي نظر نہ ٿين ھا ڪرپشن ۾ ملوث چيئرمينن ۽ ملوث آفيسرن کي ھميشہ لاءِ نااھل ڪيو وڃي.ان موقعي تي قومي عوامي تحريڪ جا اڳواڻ بابو ميمڻ، معشوق چانڊيو، ربڏنو ملڪ،راول سيال،ثناالله بڙدي، الاھي بخش ڪورائي، فقير نور جمالي، مير جمالي، سليمان يوسف زئي، فھيم اشرف، محمد علي، شاھد شاھ پڻ موجود هئا