ملير: ڦر دوران مزاحمت تي پوليس جو اي ايس آءِ شهيد، مقابلي ۾ مبينا جوابدار مارجي ويو

ڀينس ڪالوني جي روڊ 9 وٽ ڦر دوران مزاحمت تي ڦورن فائرنگ ڪري اي ايس آءِ قيصر علي کي شهيد ڪري ڇڏيو

ملير (رپورٽ: عبدالرشيد مورجھريو) ملير ضلعي جي علائقي ڀينس ڪالوني روڊ نمبر 09 تي نامعلوم هٿياربندن ڦر دوران مزاحمت تي فائرنگ ڪري هڪ پوليس اهلڪار شهيد ڪري ڇڏيو پوليس ذريعن موجب گذريل ڏينهن پيش آيل واقعي ۾ شهيد ٿيندڙ اهلڪار ڪورنگي ٿاڻي ۾ مقرر هو حملي آور موٽر سائيڪل تي سوار هئا ۽ فائرنگ بعد فرار ٿي ويا. اطلاع تي پوليس جي وڏي نفري واقعي واري هنڌ پهتي ۽ علائقي کي گهيري ۾ وٺي سرچ آپريشن شروع ڪيو شهيد اهلڪار جي سڃاڻپ 55 ورهين جي اي ايس آءِ قيصر علي ولد دوست محمد جي نالي سان ٿي، جنهن کي شديد زخمي حالت ۾ ايمبولنس ذريعي جناح اسپتال منتقل ڪيو ويو، جتي هو زخمَن جي تاب نه آڻي شهيد ٿي ويو. پوليس عملدارن واقعي واري هنڌان شاهديون گڏ ڪري جوابدارن جي گرفتاري لاءِ جاچ شروع ڪري ڇڏي آهي. قانون لاڳو ڪندڙ ادارن موجب شهيد اهلڪار جو لاش پوسٽ مارٽم بعد وارثن حوالي ڪيو ويندو ۽ کيس پوليس اعزاز سان سپردِ خاڪ ڪيو ويندو ترجمان ڪراچي پوليس شهيد اهلڪار جي خدمتن کي خراجِ تحسين پيش ڪندي واقعي جي سببن جي جاچ لاءِ اسپيشل انويسٽيگيشن ٽيم جوڙي ڇڏي آهي. ٻئي پاسي پوليس جوابدارن جي گرفتاري لاءِ ڪارروائي ڪئي ٻي طرف ٿاڻو سُڪڻ جي حدن روڊ نمبر 10 تي پراڻو ڪميلا وٽ پوليس گرفتار ملزم حسيب ولد عطا محمد جي نشاندهي تي سندس ٻين ساٿين جي گرفتاري لاءِ ڇاپو هنيو. پوليس پارٽي کي ڏسي ملزم جي ساٿين انڌا ڌنڌ فائرنگ شروع ڪري ڏني، جنهن جي نتيجي ۾ اڳ ۾ گرفتار ٿيل ملزم حسيب سخت زخمي ٿي پيو، جڏهن ته پوليس جي جوابي فائرنگ دوران ٻيا ملزم فرار ٿي ويا. زخمي ملزم حسيب کي اسپتال منتقل ڪيو ويو پر هن رستي ۾ دم ڏنو. پوليس موجب فوتي جوابدار حسيب ساڳئي ڏينهن ڦر دوران اي ايس آءِ قيصر علي کي شهيد ڪرڻ ۾ ملوث هو. واقعي واري هنڌان هڪ پسٽل ۽ گوليون به هٿ ڪيون ويون ترجمان پوليس موجب هلاڪ ٿيل ملزم اڳ به اسٽريٽ ڪرائيمز ۽ ڊڪيتين ۾ ملوث رهيو آهي ۽ سندس وڌيڪ ڪيسن بابت مختلف ٿاڻن مان ريڪارڊ چيڪ ڪيو پيو وڃي، جڏهن ته فرار ٿيل ساٿين جي گرفتاري لاءِ مختلف هنڌن تي ڇاپا هنيا پيا وڃن.