عمرڪوٽ ۾ سيد علي مردان شاهه ڊسٽرڪٽ اينڊ آل سنڌ ڪرڪيٽ ٽورنامينٽ جاري

ٽورنامينٽ جي پهرين ڪوارٽر فائينل ۾ حر شاهين پاران يوڪي ٽائيگر کي شڪست ڏني وئي

عمرڪوٽ (رپورٽ:ڪانجي مل رکيسر) ماروي گرائونڊ عمرڪوٽ ۾ جاري ٻئي الحاج مرحوم سيد علي مردان شاهه ڊسٽرڪٽ اينڊ آل سنڌ هارڊ بال ڪرڪيٽ ٽورنامينٽ جا شاندار مقابلا رحيمداڻي ڪرڪيٽ اڪيڊمي جي اهتمام، اسپانسرشپ ۽ اسپورٽس يوٿ افيئر ڊپارٽمينٽ حڪومت سنڌ جي سهڪار سان جاري آهن، ٽورنامينٽ جو پهريون ڪوارٽر فائينل حر شاهين ۽ يوڪي ٽائيگر وچ ۾ کيڏيو ويو، جنهن ۾ ٽاس کٽي حر شاهين بيٽنگ جو فيصلو ڪيو، حر شاهين مقرر 20 اوورن ۾ 3 وڪيٽن جي نقصان تي 239 رنسن جو وڏوذ ٽارگيٽ ڏنو، حر شاهين طرفان شيروز آرائين شاندار 105 رنسون ۽ دانش شيخ 60 رنسون ٺاهي نمايان رهيا، جواب ۾ يوڪي ٽائيگر جي ٽيم 210 رنسون ٺاهي سگهي، جنهن ۾ ابرار مري 70 ۽ ثاقب قائمخاني 40 رنسون ٺاهيون، پر ٽيم هدف حاصل ڪرڻ ۾ ناڪام رهي ۽ ميچ هارائي ويٺي، ۽ حر شاھين سيمي فائينل ۾ پهچي وئي، ٻئي سيڪنڊ ڪوارٽر فائينل ۾ اوڏ اسٽار ۽ الفريڊ آمهون سامهون ٿيا، ٽاس کٽي الفريڊ پهرين بيٽنگ ڪندي 20 اوورن ۾ 6 وڪيٽن جي نقصان تي 185 رنسون ٺاهيون، الفريڊ طرفان عطا سهتو 60، غلام عباس عرف ڪالي خان 50 ۽ حسين سميجو 40 رنسون ٺاهي نمايان رهيا، جواب ۾ اوڏ اسٽار زبردست ڪارڪردگي ڏيکاري، آخري اوور تائين مقابلو ڇڪتاڻ جو شڪار رهيو، پر اوڏ اسٽار پنهنجي جوهر ڏيکاريندي 20 اوورن ۾ 185 رنسون ٺاهي ميچ پنهنجي نالي ڪري ورتو، اوڏ اسٽار طرفان مدن 79 ۽ مڪيش 50 رنسون ٺاهي شاندار راند جو مظاهرو ڪيو، اوڏ اسٽار ٽيم آخري اوور ۾ ميچ کٽي سيمي فائينل ۾ پهچي وئي، جڏهن ته ميچ دوران ڪاميٽيٽر اسد علي کوسو پڻ پنهنجي بهترين انتظامي صلاحيتن سان سڀني کي متاثر ڪيو.