رزاق آباد ۾ قبضا ختم ڪرائڻ لاءِ آپريشن، سخت مزاحمت، 12 ڄڻا زخمي حالت ۾ گرفتار

ملير (رپورٽ: عبدالرشيد مورجھريو) رزاق آباد ۾ پورٽ قاسم هائوسنگ اسڪيم جي الاٽ ڪيل زمين تان قبضا ختم ڪرائڻ لاءِ پورٽ قاسم اٿارٽي، پوليس، ضلعي انتظاميا، اينٽي انڪروچمينٽ سيل ۽ رينجرز پاران ڳري مشينري سان چڙهائي ڪري آپريشن سوين ڪچا گهر ڊاهي پٽ ڪررنڇڏيا آپريشن دوران متاثر رهواسين جي سخت مزاحمت سبب علائقو ميدانِ جنگ ۾ تبديل ٿي ويو تفصيل موجب 2010ع جي ٻوڏ متاثرن پاران قائم ڪيل اها بستي ڏهاڪي کان وڌيڪ عرصي کان سوين خاندانن جي رهائش لاءِ استعمال ٿي رهي هئي. آپريشن دوران رهواسين پاران پنهنجا گهر بچائڻ لاءِ احتجاج ڪيو ويو، جنهن سبب پوليس ۽ مقامي ماڻهن ۾ جهيڙا ٿي پيا. ٻنهي ڌرين ۾ پٿراؤ ۽ لٺبازي به ٿي، نتيجي ۾ غفار مگسي، حميدالله مگسي، نواب سومرو، خان محمد جھلن سميت 12 ڄڻا زخمي حالت ۾ گرفتار ڪيا ويا. زخمين کي ابتدائي طبي امداد ڏيڻ بعد پوليس حراست ۾ رکيو ويو آهي ضلعي انتظاميا جو چوڻ آهي ته اها زمين پورٽ قاسم هائوسنگ اسڪيم لاءِ مختص آهي، جنهن تي غيرقانوني قبضا ڪيو ويو هو، سرڪاري زمين واڳرائڻ ناگزير آهي ۽ غيرقانوني آبادي ڪنهن به صورت ۾ برداشت نه ڪئي ويندي ٻئي طرف متاثر رهواسين جو چوڻ آهي ته هو 2010ع جي ٻوڏ سبب بي گهر ٿي هتي آباد ٿيا هئا ۽ ڏهاڪن کان رهائش پذير هجڻ ڪري پنهنجو سڄو پونجي گهرن جي تعمير تي لڳائي ڇڏي آهي، جڏهن ته انهن وٽ ٻي ڪو به متبادل جڳهه ناهي. سندن موقف آهي ته بغير متبادل رهائش فراهم ڪرڻ کين بي دخل ڪرڻ سنگين ناانصافي آهي عورتن ۽ ٻارن سميت وڏي انگ ۾ رهواسين احتجاج ڪندي مطالبو ڪيو آهي ته کين فوري طور تي متبادل رهائش ڏني وڃي. صورتحال تي ضابطو آڻڻ لاءِ اينٽي انڪروچمينٽ پوليس جي اضافي نفري به طلب ڪئي وئي آهي، جڏهن ته علائقي ۾ ڇڪتاڻ برقرار آهي۔