پوليس جي منشيات فروشن خلاف ڪارروائي، اهلڪار ۽ عورت سميت 5 ڄڻا زخمي

ٺٽو ( محمد شفيق ڀٽي)گٽڪو ميٽريل جي سپلاءِ جي ڪوشش پوليس طرفان ناڪام، ڪارروائي دوران پوليس اهلڪار ۽ رستي ويندڙ شهري زخمي تفصيل موجب پوليس کي اطلاع مليو ته هڪ ڪار نمبر AZR-255 ۾ گٽڪي جو ميٽريل سپلاءِ ڪرڻ جي ڪوشش ڪئي پئي وڃي. اطلاع ملڻ بعد ايس ايڇ او ٿاڻو مڪلي سب انسپيڪٽر رياض مهيسر پنهنجي عملي سميت گرڊ اسٽيشن مڪلي جي ويجهو ناڪابندي ڪئي. ملزمن پوليس کي ڏسي ڪار تيز رفتاري سان هلائيندي فرار ٿي ويا. پوليس تعاقب ڪيو ته ملزمن فرار ٿيندي فائرنگ شروع ڪري ڏني، جنهن جي نتيجي ۾ پوليس اهلڪار اِڪرام ابڙو ۽ موٽر سائيڪل تي سوار شهري پيار علي خاصخيلي گولين لڳڻ سبب زخمي ٿي پيا. فرار ٿيندڙ ڪار جو ٽڪر ايمبولينس سان ٿي پيو، جنهن ۾ ايمبولينس جو ڊرائيور لياقت علي پتافي، سجاد علي خاصخيلي ۽ هڪ عورت مسمات حوا خاصخيلي زخمي ٿي پيا. زخمين کي ترت طبي امداد لاءِ اسپتال منتقل ڪيو ويو آهي. پوليس ڪار کي تحويل ۾ وٺي گٽڪو ميٽريل هٿ ڪري ورتو آهي، ۽ وڌيڪ قانوني ڪارروائي جاري آهي. فرار ٿيل ملزمن جي سڃاڻپ ٿي وئي آهي ۽ ايس ايس پي ٺٽو ڊاڪٽر محمد عمران خان جي هدايت تي گرفتاري لاءِ پوليس ٽيمون مقرر ڪيون ويون آهن، جيڪي مختلف هنڌن تي ڇاپا هڻي رهيون آهن.