ٽالهي ۾ ڪئنالن خلاف قومي عوامي تحريڪ ۽ سنڌياڻي تحريڪ جي ريلي

زينت سمون، نصرت خاصخيلي، ڪرڙ ريٻاري، زاهد گل اوٺو ۽ ٻين جي اڳواڻي ۾ ريلي ڪڍي وئي

عمرڪوٽ(رپورٽر) عمرڪوٽ جي شھر ٽالھي ۾ سنڌياڻي تحريڪ ۽ قومي عوامي تحريڪ جي سڏ تي 6 نوان ڪئنال ٺاھڻ، ڪارپوريٽ فارمنگ ۽ سنڌو درياھ تي ڌاڙي خلاف سنڌياڻي تحريڪ جي مرڪزي صدر زينت سمون، جنرل سيڪريٽري نصرت خاصخيلي، سنڌي ھاري تحريڪ جي مرڪزي آرگنائيزر ڪامريڊ ڪرڙ ريٻاري، زاھد گل اوٺو، انور نوحاڻي، ادي گنگا ڪولھي، نيلان ڪولھي، حيدر ڀٽي، تاج ڀٽي، لالجي پرمار، پيربخش گشڪوري، سوجي ڪولھي، سرويج اوٺو، مھرو مل، سڄڻ ڪولھي، مانسنگھ ڪولھي ۽ ٻين جي اڳواڻي ۾ ٽالھي اسٽيشن ۾ يونين ڪائونسل آفيس کان پيادل مارچ ڪري شھر جو گشت ڪرڻ بعد پريس ڪلب اڳيان جلسو ڪيو ويو. پيادل مارچ ۾ ھزارين ماڻھو شريڪ ھئا. عورتن جي ھٿن ۾ ڏانٽا کنيل ھئا. جلسي کي خطاب ڪندي سنڌياڻي تحريڪ جي مرڪزي صدر زينت سمون خطاب ڪندي چيو تہ سنڌي ماڻھو سجاڳ ٿي ويا آھن، ڪنھن بہ قيمت تي درياھ تي ڌاڙو ھڻڻ نہ ڏينداسين. آصف زرداري ڪئنالن جي منظوري ڏئي پيپلز پارٽي جي تابوت ۾ ڪوڪو ٺوڪيو آھي. پيپلز پارٽي 4 اپريل جي جلسي خاطر عوام کي دوکو ڏيڻ لاءِ ڪئنالن خلاف احتجاج اعلان ڪيو ويو آھي. جيڪڏھن پيپلز پارٽي سچي آھي تہ آصد زرداري آرڊيننس جاري ڪري سنڌ دشمن ڪئنالن جو ڪم بند ڪرائي ڇڏي. شھباز شريف جي حڪومت پيپلز پارٽي جي ووٽ سان ھلي رھي آھي. پيپلز پارٽي ڪئنالن خلاف حڪومت کان ڌار ٿي وڃي. حڪومت ۾ ويھي ڪئنالن خلاف احتجاج سنڌ جي عوام سان دوکو آھي. آصف زرداري درياھ سميت سنڌ جا وسيلا وڪڻي رھيو آھي. پٽ کي وزيراعظم بنائڻ لاءِ سنڌو درياھ ۽ ٻين وسيلن جو سودو ڪيو ويو آھي. پيپلز پارٽي جي اجازت سان ارسا چولستان ڪئنال لاءِ پاڻي منظور ڪيو آھي. انڊس رور سسٽم ۾ پاڻي ناھي. ارسا پاڻي تي ڌاڙا ھڻڻ ۾ سھولتڪار آھي. سنڌ حڪومت عوام کي بيوقوف بنائڻ لاءِ کوکلي مخالفت ڪري رھي آھي. زرداري 8 جولائي تي ڪئنالن جي منظوري ڏني. سنڌياڻي تحريڪ جي مرڪزي جنرل سيڪريٽري نصرت خاصخيلي خطاب ڪندي چيو تہ چولستان سميت 6 ڪئنال ٺھي ويا ته سنڌ دنيا جو وڏو ريگستان بنجي ويندي. لکين ماڻھو بک ۽ اڃ مري ويندا. آصف زرداري ۽ شھباز شريف ڪرپشن ۽ اقتدار خاطر سنڌ کي مال غنيمت بنائي لٽي رھيا آھن. سنڌ جون نياڻيون، نوجوان، ھاري ۽ پورھيت رستن تي اچي پنھنجي درياھ کي بچائين. ھي وقت پنھنجو درياھ ۽ پنھنجي نسلن کي بچائڻ جو آھي. اسان ڪالاباغ ڊيم ٺاھڻ نہ ڏنو ائين ڪئنال بہ ٺاھڻ نہ ڏينداسين. پيپلز پارٽي ھر دور ۾ عوام کي ڪوڙا دلاسا ۽ دوکا ڏنا آھن. گنگا ڪولھي خطاب ڪندي چيو تہ 17 سالن کان سنڌ تي مسلط ڪيل پ پ حڪومت سنڌو درياھ، لکين ايڪڙ زمين، ڪينجھر، ڪارونجھر، گورک، تيل، گئس، ڪوئلي سميت سمورا وسيلا کپائي ڇڏيا آھن. سنڌو درياھ تي ڌاڙن سبب سنڌ کي پنھنجي حصي جو پاڻي نٿو ڏنو وڃي. ارسا سنڌ دشمن آھي. مخالفت باوجود چولستان ڪئنال جو ڪم جاري رکڻ جو مطلب پاڪستان صرف پنجاب آھي. سنڌ کي ڪالوني بنايو ويو آھي. ڪوٽڙي کان ھيٺ پاڻي نٿو ڇڏيو وڃي. سمنڊ ٺٽي سميت ساحلي پٽي جي ضلعن جي لکين ايڪڙ زمين ڳڙڪائي ويو آھي. ڪامريڊ ڪرڙ ريٻاري چيو ته غربت ۽ مھانگائي جي ڪري لکين خاندان بدحال آھن. اربين رپين جو تيل، گئس ڏيندڙ سنڌ سڄي ملڪ ۾ سڀ کان وڌيڪ غربت جو شڪار آھن. گيس جي لوڊشيڊنگ ۽ بجلي جي لوڊشيڊنگ آھي. پيئڻ جو پاڻي ناھي. عظيم سنڌو درياھ اسان جي نسلن جي جياپي جو ذريعو آھي. ٿر مان ڪوئلو نڪري ٿو. بجلي ٺھي ٿي پر ٿر جا ماڻھو غربت سبب خودڪشيون ڪرڻ تي مجبور آھن. آصف زرداري ايوان صدر ۾ ويھي 6 ڪئنالن ۽ گرين انيشيٽو منصوبن جي منظوري ڏني آھي. ڪارپوريٽ فارمنگ جي نالي ۾ سنڌ جي زمينن تي قبضا ڪيا پيا وڃن. گرين انيشيٽو سنڌ لاء موت جو منصوبو آھي. 7 ڪروڙ سنڌين کي قتل ڪرڻ جو منصوبو آھي. خاموش رھياسين تہ 2030 تائين سنڌ برپٽ ۽ بيابان بنجي ويندي ۽ اسان جا ايندڙ نسل فقير ٿي ويندا. بدين، ٺٽو، ٽنڊو محمد خان، سجاول ۽ ڪراچي ٻڏي ويندا. معاشي پاليسيون ھاري ۽ مزدور دوست ناھن. زاھد گل اوٺو چيو تہ حڪمرانن غربت، بدحالي، قبيلائي جھيڙن، ڌاڙيل راڄ مسلط ڪرڻ کانپوء سنڌ کي نيلام گھر بنائي ڇڏيو آھي. زرداري حڪومت درياھ ۽ وسيلا وڪڻڻ کانپوءِ بلاول ۽ ٻيا پ پ حڪمران سنڌ جي عوام کي دوکو ڏيڻ لاءِ ڪوڙا بيان ڏئي رھيا آھن. ڌرتي ڌڻين جا ڳوٺ ڊاھي زمينن تي قبضا ڪيا پيا وڃن ۽ غير قانوني پرڏيھين کي تحفظ ڏنو پيو وڃي. انڊس رور سسٽم ۾ ضرورت جيترو پاڻي ناھي. نوان ڪئنال ۽ ڊيم سنڌ جو پاڻي چوري ڪرڻ لاء ٺاھيا پيا وڃن. سنڌ دشمن منصوبا ٺاھڻ نہ ڏينداسين. 20 ملين ايڪڙ فوٽ پاڻي سمنڊ ۾ ڇوڙ ڪيو وڃي. 91 ٺاھ تي عمل ڪري سنڌ کي پنھنجي حصي جو پاڻي ڏنو وڃي. ڪراچي کان ڪمون شھيد تائين سنڌ جا ماڻھو رستن تي آھن. ھي جياپي جي جنگ آھي. خاموش نہ ويهنداسين. 6 ڪئنال ڪالاباغ ڊيم کان بہ وڌيڪ خطرناڪ آھن. وفاقي ۽ سنڌ حڪومت سنڌ کي مال غنيمت ڪري لٽي رھي آھي. سنڌ جا ماڻھو ساھ جي آخري ھڏڪي تائين درياھ تي ڌاڙو ھڻڻ نه ڏيندا. 6 ڪئنال، گرين پاڪستان ۽ ڪارپوريٽ فارمنگ منصوبا اسان جي نسلن جا دشمن آھن..زاھد گل اوٺو خطاب ڪندي چيو تہ پ پ حڪومت وٽ عوام لاءِ ڪجھ ناھي. اسين ڪڏھن بہ درياھ تي ڌاڙو ۽ سنڌ دشمن ڪئنال ٺاھڻ نہ ڏينداسين. سنڌي ماڻھو پنھنجي درياھ لاءِ جدوجھد جي ميدان تي آھن. وفاقي حڪومت سنڌي ماڻھن جي احتجاج کي نظرانداز ڪرڻ بند ڪري. سنڌي ماڻھو ھاڻ سمجھي ويا آھن تہ پيپلز پارٽي حڪومت وٽ ڪرپشن ۽ وسيلن جي ڦرلٽ کانسواءِ ڪجھ ناھي. سنڌ ۾ قانون ۽ انصاف ناھي. سنڌياڻي تحريڪ کي جس ھجي ڪئنالن ۽ سنڌ دشمن منصوبن خلاف جدوجھد ڪري رھي آھي. گرين پاڪستان ۽ 6 ڪئنالن جي منظوري آصف زرداري ڏني آھي ۽ بدلي ۾ اقتدار ورتو آھي. سنڌو درياھ اسان جي زندگي آھي. پنجاب سنڌو درياھ تي قاتلانه حملو ڪيو آھي. ڪئنال ٺھيا تہ سنڌ جا ماڻھو پاڻي ڦڙي لاء سڪي ويندا. گرين پاڪستان دراصل گرين پنجاب آھي. ڪڏھن زمينن تي قبضو تہ ڪڏھن وسيلن تي قبضا ڪيا وڃن ٿا. پيپلز پارٽي سنڌ دشمن فيصلا ڪري رھي آھي. سنڌ جي ماڻھن جيئن ڪالاباغ ڊيم ٺھڻ نہ ڏنو ائين ڪئنال بہ ٺھڻ نہ ڏينداسين. سنڌ جا ماڻھو سجاڳ آھن. ڪڏھن بہ ڪئنال ۽ گرين پاڪستان جھڙا خطرناڪ منصوبا ٺھڻ نہ ڏينداسين. سنڌ سان ھر دور ۾ ناجائزون ڪيون ويون آھن. پنجاب سنڌو درياھ تي ڌاڙا ھڻي رھيو آھي. 91 واري ٺاھ تحت سنڌ کي پاڻي نٿو ڏنو وڃي. تيل، گئس، ڪوئلي سميت سمورا وسيلا ھڙپ ڪيا پيا وڃن. ڪئنالن سميت ڪو بہ ڊئم برداشت نہ ڪيو ويندو. سنڌ جي آباد زمينن کي بنجر ۽ پنجاب جي ريگستان کي آباد ڪرڻ لاءِ ڪئنال ٺاھيا پيا وڃن. ڪئنال ٺھيا تہ سکر کانپوءِ درياھ ۾ واري اڏامندي. پنجاب جي ھڪ ڪروڙ زمين آباد ڪئي ويندي. ٻئي طرف ٽالھي ۾ سنڌياڻي تحريڪ جي ڪانفرنس ٿي، جنھن ۾ ضلعي عمر ڪوٽ لاءِ سنڌياڻي تحريڪ جي آرگنائيزنگ باڊي جوڙي وئي، جنهن ۾ آرگنائزر گنگا ڪولھي، ميمبرن ۾ نيلان، سيتا، لڇمي ۽ سوڍي ڪولھي کي چونڊيو ويو. 23 اپريل تي سنڌياڻي تحريڪ جي گڏجاڻي ڪوٺائي وئي.