قومي عوامي تحريڪ جو صوفي شاهه عنايت شهيد جي مزار کان جهوڪ شريف تائين پيادل مارچ

سنڌو درياءَ مان 6 نوان ڪئنال ڪڍڻ سان لاڙ پٽي سجاول،بدين، ٺٽو ضلعن کي سمنڊ ڳڙڪائي ويندو: اشرف پليجو

جھوڪ شريف (رپورٽر) قومي عوامي تحريڪ سجاول ضلعي پاران سنڌو درياھ مان 6 نوان ڪئنال ڪڍڻ ۽ ڪارپوريٽ فارمنگ خلاف قومي عوامي تحريڪ جي مرڪزي پريس ترجمان اشرف پليجو، قومي عوامي تحريڪ ضلعي سجاول جي آرگنائيزر پنھل سولنگي، زين سومرو، غلام حسين سولنگي، مجيد چانگ، غلام رسول سولنگي، ۽ ٻين جي اڳواڻي سوين ماڻهن صوفي شاھ عنايت شهيد جي مزار کان پيادل مارچ ڪري مين بس اسٽاپ جھوڪ شريف پھچي ڌرڻو هنيو ويو، پيادل مارچ ۾ تحريڪ انصاف ضلعي سجاول جي اڳواڻ ذوالفقار جتوئي جي اڳواڻي ۾ ڪارڪنن شرڪت ڪئي ان موقعي تي ڌرڻي کي خطاب ڪندي قومي عوامي تحريڪ جي مرڪزي پريس ترجمان اشرف پليجي چيو تہ سنڌو درياءَ مان 6 نوان ڪئنال ڪڍڻ سان لاڙ پٽي سجاول،بدين، ٺٽو ضلعن کي سمنڊ ڳڙڪائي ويندو ۽ سڄي سنڌ سڪي تباھ ٿي ويندي. سنڌو درياءَ سنڌين جي جان آهي سنڌ جو ٻچو ٻچو پنهنجي درياھ کي بچائڻ لاءِ وڙھندو سنڌي ماڻھو ڪڏھن بہ پنھنجو درياھ وڪرو ٿيڻ نہ ڏيندا. چولستان ڪئنال ۽ ٻيا ڌاڙيل واھ ھرگز قبول ناھن. سنڌ کي ڀڙڀانگ ۽ بنجر ٿيڻ نہ ڏنو ويندو. سنڌي ماڻھو پنھنجي درياھ ۽ وسيلن لاءِ ھڪ آواز آھن.سنڌ دشمن ڪئنالن جو منصوبو ڪرپٽ حڪمرانن جي اقتدار جي تابوت ۾ آخري ڪوڪو ثابت ٿيندو. قومي عوامي تحريڪ سجاول ضلعي جي آرگنائيزر پنھل سولنگي خطاب ڪندي چيو تہ جيئن اسان ڪالاباغ ڊيم ٺاھڻ نہ ڏنو ائين ڪئنال بہ ٺاھڻ نہ ڏينداسين. سنڌو درياھ اسان جي نسلن جي جياپي جو ذريعو آھي. درياھ نہ رھيو تہ سنڌ بنجر ۽ ڀڙڀانگ ٿي ويندي. ڪارپوريٽ فارمنگ جي نالي ۾ سنڌ جي لکين ايڪڙ زمينن تي قبضا ڪيا پيا وڃن. گرين انيشيٽو سنڌ لاء موت جو منصوبو آھي. خاموش رھياسين تہ 2030 تائين سنڌ ريگستان بنجي ويندي. آصف زرداري کي صرف پنھنجي ذاتي ملڪيت وڪڻڻ جو حق آھي، سنڌو درياھ جي سودي ڪرڻ جو ھن کي ڪو بہ اختيار نہ آهي سنڌ ۾ رھندڙ سموريون ٻوليون ڳالھائيندڙ ماڻهو سنڌو درياھ تي ڌاڙي خلاف جدوجھد ڪن. قومي عوامي تحريڪ ضلعي سجاول جي جنرل سيڪريٽري زين سومرو خطاب ڪندي چيو تہ ڪراچي کان ڪشمور تائين رھندڙ ماڻھو درياھ کي بچائڻ لاءِ ٻارين ٻچين آواز بلند ڪن. اياز لطيف پليجو ۽ قومي عوامي تحريڪ جو ساٿ ڏين. 6 ڪئنال ڪالاباغ ڊيم کان بہ وڌيڪ خطرناڪ آھن. زرداري ۽ شھباز شريف جي حڪومت سنڌ کي مال غنيمت ڪري لٽي رھي آھي. سنڌ جا ماڻھو ساھ جي آخري ھڏڪي تائين درياھ تي ڌاڙو ھڻڻ نہ ڏيندا. 6 ڪئنال، گرين پاڪستان ۽ ڪارپوريٽ فارمنگ منصوبا سنڌ دشمن اسان جي نسلن جا دشمن آھن. تحريڪ انصاف جي اڳواڻ ذوالفقار جتوئي خطاب ڪندي چيو تہ پ پ حڪومت وٽ سنڌي ماڻهن لاءِ ڪجھ ناھي. اسين ڪڏھن بہ درياھ تي ڌاڙو ۽ سنڌ دشمن ڪئنال ٺاھڻ نہ ڏينداسين. سنڌي پنھنجي درياھ لاءِ جدوجھد جي ميدان تي آھن. وفاقي حڪومت ڪئنال ۽ گرين پاڪستان جا منصوبا بند نہ ڪيا تہ ان جا خطرناڪ نتيجا نڪرندا. سنڌ جو پاڻي چوري ڪرڻ، ڊيم يا ڪئنال ٺاھڻ غير آئيني ۽ غير قانوني منصوبا آھن. وفاقي حڪومت سنڌي ماڻھن جي احتجاج کي نظرانداز ڪرڻ بند ڪري. آبادگار اڳواڻ شاھ نواز لنڊ خطاب ڪندي چيو تہ سنڌو درياھ تي ڌاڙو برداشت نہ ڪيو ويندو. سنڌي ماڻھو ھاڻ سمجھي ويا آھن تہ پيپلز پارٽي حڪومت وٽ ڪرپشن ۽ وسيلن جي ڦرلٽ کانسواءِ ڪجھ ناھي. سنڌ ۾ قانون ۽ انصاف ناھي. سنڌي ھاري تحريڪ جي مرڪزي اڳواڻ يوسف لاشاري خطاب ڪندي چيو تہ گرين پاڪستان ۽ 6 ڪئنالن جي منظوري آصف زرداري ڏني آھي ۽ بدلي ۾ اقتدار ورتو آھي. سنڌو درياھ اسان جي زندگي آھي. پنجاب سنڌو درياھ تي قاتلانه حملو ڪيو آھي. ڪئنال ٺھيا تہ سنڌ جا ماڻھو پاڻي ڦڙي لاء سڪي ويندا. قومي عوامي تحريڪ جي اڳواڻ زين سومرو خطاب ڪندي چيو تہ گرين پاڪستان دراصل گرين پنجاب آھي. ڪڏھن زمينن تي قبضو تہ ڪڏھن وسيلن تي قبضا ڪيا وڃن ٿا، سنڌ جي حقن لاء سڀني کي جدوجھد تيز ڪرڻ گھرجي. پيپلز پارٽي سنڌ دشمن فيصلا ڪري رھي آھي. آبادگار اڳواڻ سائين ستار سولنگي خطاب ڪندي چيو تہ سنڌ جا ماڻھو سجاڳ آھن. ڪڏھن بہ ڪئنال ۽ گرين پاڪستان جھڙا خطرناڪ منصوبا ٺھڻ نہ ڏينداسين. سنڌ سان ھر دور ۾ ناجائزون ڪيون ويون آھن. سولنگي اتحاد جي اڳواڻ ستار سولنگي خطاب ڪندي چيو تہ پنجاب سنڌو درياھ تي ڌاڙا ھڻي رھيو آھي. 91 واري ٺاھ تحت سنڌ کي پاڻي نٿو ڏنو وڃي. تيل، گئس، ڪوئلي سميت سمورا وسيلا ھڙپ ڪيا پيا وڃن. ڪئنالن سميت ڪو بہ ڊئم برداشت نہ ڪيو ويندو. سماجي اڳواڻ رزاق لنڊ خطاب ڪندي چيو تہ سنڌ جي آباد زمينن کي بنجر ۽ پنجاب جي ريگستان کي آباد ڪرڻ لاءِ ڪئنال ٺاھيا پيا وڃن. ڪئنال ٺھيا تہ سکر کانپوءِ درياھ ۾ واري اڏامندي. پنجاب جي ھڪ ڪروڙ زمين آباد ڪئي ويندي. آصف زرداري کي سنڌ جي وسيلن جو سودو ڪرڻ جو ڪو حق ناھي. سنڌي ماڻھو پنھنجي درياھ ۽ ٻين وسيلن لاءِ گڏ آھن.قومي عوامي تحريڪ جي اڳواڻ مجيد چانگ خطاب ڪندي چيو تہ وفاقي حڪومت ڪئنال ۽ گرين پاڪستان جا منصوبا بند نہ ڪيا تہ ان جا خطرناڪ نتيجا نڪرندا. سنڌ جو پاڻي چوري ڪرڻ، ڊيم يا ڪئنال ٺاھڻ غير آئيني ۽ غير قانوني منصوبا آھن.