14کلو سونا اسمگل کرنے والی بھارتی اداکارہ کا حیران کن انکشاف: "یوٹیوب سے سونا چھپانے کے طریقے سیکھے

رانیا راؤ کو 12 کروڑ 56 لاکھ بھارتی روپے مالیت کے 14.2 کلو گرام سونا اسمگل کرنے کے الزام میں گرفتار کیا گیا تھا

14کلو گرام سے زائد سونا اسمگل کرنے کے الزام میں گرفتار بھارتی کناڈا فلموں کی اداکارہ رانیا راؤ نے دورانِ تفتیش انکشاف کیا کہ انہوں نے سونا چھپانے کے طریقے یوٹیوب سے سیکھے۔ بھارتی میڈیا کے مطابق چند روز قبل رانیا راؤ کو 12 کروڑ 56 لاکھ بھارتی روپے مالیت کے 14.2 کلو گرام سونا اسمگل کرنے کے الزام میں گرفتار کیا گیا تھا۔ رپورٹس کے مطابق دورانِ حراست ڈائریکٹوریٹ آف ریونیو انٹیلی جنس (ڈی آر آئی) کی جانب سے پوچھ گچھ میں اداکارہ نے بتایا کہ انہیں دبئی انٹرنیشنل ایئرپورٹ کے ٹرمینل 3 کے گیٹ اے سے سونا وصول کرنے کے لیے انٹرنیٹ کالز موصول ہوئیں۔ انہوں نے انکشاف کیا کہ اس سفر سے دو ہفتے قبل ہی انہیں غیر ملکی نمبرز سے کالز آ رہی تھیں، جس کے بعد انہوں نے پہلی بار سونا اسمگل کرنے کا فیصلہ کیا۔ رانیا راؤ نے بتایا کہ ایئرپورٹ کے ڈائننگ لاؤنج میں سفید گاؤن میں ملبوس ایک نامعلوم شخص نے انہیں دو پیکٹ دیے تھے، جبکہ سونا چھپانے کے طریقے انہوں نے یوٹیوب سے سیکھے۔ بھارتی میڈیا کے مطابق، ایئرپورٹ پر سونا وصول کرنے کے بعد رانیا راؤ اسے واش روم لے گئیں، جہاں انہوں نے سونے کی سلاخوں کو ٹیپ سے چپکا کر اپنے کپڑوں میں چھپا لیا۔ مزید برآں، اداکارہ نے جوتوں اور جیبوں میں بھی سونے کے چھوٹے ٹکڑے چھپا رکھے تھے۔ واضح رہے کہ رانیا راؤ کناڈا فلم 'مانکیا' میں سپر اسٹار سدیپ کے مدمقابل کردار ادا کرنے کے باعث مشہور ہیں۔