سنڌو درياهه مان ڪئنال ڪڍڻ خلاف سنڌي مين اسڪول ٽنڊوآدم جي شاگردن ۽ استادن پاران احتجاج

ٽنڊوآدم (حسنين عاشق ساند) سنڌو درياهه مان 6 نوان ڪئنال ڪڍڻ خلاف سنڌي مين اسڪول ٽنڊوآدم جي شاگردن ۽ استادن پاران شديد احتجاج رڪارڊ ڪرايو ويو. خبر موجب گورنمنٽ مين سنڌي پرائمري اسڪول ٽنڊوآدم جي هيڊ ماستر لکاڏنو خاصخيلي، ٻين استادن ۽ شاگردن پاران صبح جو اسيمبلي کان ئي سنڌو درياهه مان 6 نوان ڪئنال ڪڍڻ خلاف احتجاجي مظاهري جي شروعات ڪئي وئي. ان موقعي تي "سنڌو تي ڌاڙو نامنظور، ڪئنال سمورا نامنظور جا اڀ ڏاريندڙ نعرا هنيا ويا. ان موقعي تي هيڊ ماستر لکاڏنو خاصخيلي خطاب ڪندي چيو ته سنڌو درياهه سنڌ واسين لاءِ حياتي جو سرچشمو آهي جنهن مان وڌيڪ ڪئنال ڪڍڻ سان سنڌ جون سرسبز زمينون بنجر بڻجي وينديون، جنهن سان زراعت کي وڏو نقصان رسندو. احتجاج ڪندڙن چيو ته اڳ ئي سنڌ ۾ پاڻي کوٽ سبب 40 ضلعن ۾ ڏڪار جهڙي صورتحال پيدا ٿي چڪي آهي. جيڪڏهن وڌيڪ ڪئنال ڪڍيا ويا ته سنڌ جي زمينن کي بنجر بڻائڻ جي سازش مڪمل ٿي پوندي. مظاهرين مطالبو ڪيو ته سنڌو درياهه مان 6 نوان ڪئنال ڪڍڻ وارو منصوبو فوري طور تي بند ڪيو وڃي ته جئين سنڌ جو زرعي مستقبل محفوظ رهي سگهي.