ملير: ميمڻ ڳوٺ ۾ بلڊر جي گهر تي مبينا حملو، لکين رپين جي ڦرلٽ

8کان وڌيڪ هٿياربندن گهر تي ڪاهه ڪري گهرڀاتين کي يرغمال بڻائي ورتو: قمر جان بلوچ

ملير (رپورٽر) ملير ۾ بدامني تي ضابطو نه اچي سگهيو، ميمڻ ڳوٺ ۾ بلڊر جي گهر تي هٿياربندن جي چڙهائي، جوابدار گهر ڀاتين کي يرغمال بڻائي 75 تولا سونا زيور، 25 لک روڪ رقم، موبائل فونون ۽ قيمتي سامان ڦر ڪري فرار، اطلاع ملڻ تي پوليس پهچي واقعي واري هنڌ جو جائزو ورتو ۽ تفصيل گڏ ڪيا، تفصيل موجب ملير ۾ بدامني تي ضابطو نه اچي سگهيو آهي ڦر ۽ چوري جون وارداتون عروج تي پهچي ويون آهن، گهرن تي منظم طريقي سان چڙهايون ڪري ڦر ۽ ڌاڙن جون وارداتون گهٽجي نه سگهيون آهن، گذريل ڏينهن اڌ رات جو ميمڻ ڳوٺ ٿاڻي جي حد ۾ ميمڻ ڳوٺ جي نامياري بلڊر قمر جان بلوچ جي گهر تي 8 کان وڌيڪ هٿياربندن چڙهائي ڪري ننڊ پيل گهر ڀاتين کي يرغمال بڻائي ورتو ۽ گهر ۾ موجود سڀني الماڙين جا تالا ڀڃي 75 تولا سونا زيور، 25 لک رپيا روڪ، موبائيل فونون ۽ قيمتي ڪپڙن سميت ٻيو سامان چورائي آسان سان فرار ٿي ويا، جوابدار ٻن ڪلاڪن کان وڌيڪ گهر ۾ بنا ڪنهن کٽڪي جي واردات ڪندا رهيا ياد رهي ته گذريل ٻن مهينن ۾ ميمڻ ڳوٺ سميت ملير مان ڌاڙي جون 6 کان وڌيڪ وارداتون ٿي ويون آهن، جن ۾ لکين رپيا روڪ رقم، موبائل فونون سونا زيور ڦر ڪيا ويا آهن پر پوليس هيل تائين هڪ به جوابدار کي گرفتار نه ڪري سگهي آهي، ان سلسلي ۾ علائقي واسين جو چوڻ آهي ته ملير ۾ قانون لاڳو ڪندڙ ادارن جي رٽ مڪمل طور تي ختم ٿي وئي آهي ۽ ملير ڪچي جو علائقو بڻجي ويو آهي جتي ڪنهن به قسم جي قانون جي پاسداري نه آهي، سندن چوڻ هو ته اڳي روڊ، رستن، بازارن ۾ غير محفوظ هئاسين هاڻي ته اسان گهرن ۾ به غيرمحفوظ ٿي ويا آهيون جڏهن ته پوليس صرف ريتي، بجري مافيا، ليڊ گريبرن کان ڀتو اوڳاڙڻ ۾ مصروف آهي، هنن سنڌ جي وڏي وزير، گهرو وزير، آئي جي سنڌ کان مطالبو ڪيو ته نااهل پوليس آفيسرن ۽ اهلڪارن کي برطرف ڪري ايماندار آفيسرن کي مقرر ڪيو وڃي، هاڻي اسان جي صبر جا پئمانا لبريز ٿي چڪا آهن فوري طور تي جوابدارن کي گرفتار ڪري امن بحال ڪرايو وڃي ٻي صورت ۾ ملير جي ٿاڻن اڳيان احتجاجي مظاهرا ڪري ڌرڻا هنيا ويندا.